Девис кубоги мусобақасининг Осиё-Океания минтақаси 1-гуруҳидан ўрин олган Хитой-Ўзбекистон тўқнашуви вакилларимиз фойдасига ҳал бўлди. Бугун бўлиб ўтган яккалик баҳсида Денис Истомин ютқазиб қўйганидан кейин барча масала Фаррух Дўстов ихтиёрида қолганди.

Сўнгги пайтларда ўзи иштирок этаётган мусобақаларда жуда яхши натижа қайд этиб, ўзининг яхши формада эканини намойиш қилиб келган Фаррух, мураббийлар штабининг ишончини оқлади ва терма жамоамизга ғалаба келтирди.

Хитойнинг иккинчи рақамли теннисчиси Зе Жанг билан баҳснинг биринчи сетида Дўстов қанчалик осонлик билан ғалаба қозонган бўлса (6:2), иккинчи сетни шунчалик осон бой берди - 1:6. Учинчи сетда яна ҳамюртимиз устунликни ўз томонига оғдирди — 6:3.

Тўртинчи сетда хитойлик теннисчи ўйинни бир амаллаб тай-бреккача олиб борди ва унда ғалаба қозонди - 7:4. Ҳал қилувчи сетда Фаррух яна ўз маҳоратини намойиш қилди ва 6:3 ҳисобида ғалаба қозонди.

Аслида Фаррух Дўстов Хитойнинг биринчи ракеткаси билан ўйинда ҳам ғалабага жуда яқин келганди. Ўша ўйинда Ду Вей 3та сетда тай-брекда ғалаба қозонган бўлса, Фаррух ўз сетларини осонлик билан енгиб олганди — 6:1, 6:3.

Муросасиз кечган тўқнашувда терма жамоамиз 3:2 ҳисобида ғалаба қозонди. Ўйинларнинг 3таси 5 сетда давом этган бўлса, 1та баҳс 4 сетда якунланди. Жуфтликлар баҳсида эса Истомин/Дўстов жуфтлиги 3та сетда ўйин тақдирини ҳал қилишди.

Шу тариқа, терма жамоамиз Жаҳон лигасига чиқиш учун плей-офф мусобақасида иштирок этиш ҳуқуқини қўлга киритишди.

Девис кубоги, Осиё/Океания минтақаси, 1-гуруҳ
Иккинчи босқич, 4-6 апрель, Тианцзин теннис маркази
ХИТОЙ - ЎЗБЕКИСТОН - 2:3
Зе Жанг - Денис Истомин - 2:3 (4-6, 6-4, 6-3, 3-6, 4-6)
Ди Ву - Фаррух Дўстов - 3:2 (1-6, 7-6(4), 7-6(4), 3-6, 9-7)
Мао-Син Гонг/Же Ли - Фаррух Дўстов/Денис Истомин - 0:3 (4-6, 2-6, 2-6)
Ди Ву - Денис Истомин - 3:1 (1-6, 7-5, 6-3, 7-5)
Зе Жанг - Фаррух Дўстов - 2:3 (2-6, 6-1, 3-6, 7-6(4), 3-6)