Мамлакатимизнинг ёш мураббийларидан бири Мухтор Қурбонов «Эрудит Спорт» нашрида 5-тур учрашувлари олдидан фикрларини билдираркан, Андижонда ўтадиган «Андижон» - «Динамо» учрашувига тўхталиб ўтди.

«Ниҳоят, ўтган турда дастлабки очкосини қўлга киритган андижонликлар ушбу турда ишқибозларига биринчи ғалабани тақдим этиш учун бор куч ва имкониятларини ишга солишлари аниқ. Зеро, ғалаба Азамат Абдураимов жамоаси учун сув ва ҳаводек зарур. Шу боис, «Андижон» ғалаба қозониш йўлида катта босим остида бўлади. Кўрамиз, ҳозирча мавсумда гол нима эканлигини билмай келаётган «Андижон» футболчилари ёқимсиз бу анъанани буза олишармикан?

«Металлург», «Сўғдиёна»ни мағлуб этган «Динамо» эса ўтган турда «Бунёдкор»га мухлислари қаршисида ютқазди. Ушбу мағлубият аламини Равшан Ҳайдаров шогирдлари «Андижон»дан олишга келаётганлиги ҳам сир эмас» - дейилади газета тур олди превьюсида.

Бу борада 5-тур ўйин олди мулоҳазалари билан ўртоқлашган «Шўртан» бош мураббийи Мухтор Қурбонов ҳам водийдаги бу учрашувнинг жанговор ўтишини таъкидлаб ўтган.

«Андижондаги баҳс шиддатли ўтишига шубҳам йўқ. Бу учрашувдан ҳар икки томон мухлислари ҳам ўз суюклиларидан ғалаба кутишга ҳақли. Ўйин водийликлар мезбонлигида ўтаётганлиги боис, уларнинг имконияти бироз юқорироқ деб ўйлайман. Аммо, унутмаслик керакки кўҳна шаҳарликлар сўнгги сафар ўйинида «Сўғдиёна»ни мағлуб этганди. Самарқанд жамоасига нисбатан ҳурматни сақлаган ҳолда айтишим мумкинки, бу сафар «Андижон» ўз уйидаги имкониятни қўлдан чиқариб юбормасликка зўр беради» - дейди таниқли собиқ футболчи Мухтор Қурбонов.

Эслатиб ўтамиз, «Динамо» жамоаси 12 апрель куни Андижонда меҳмон бўлади. Учрашув соат 16:00да «Соғлом авлод» стадиони бошланади.