Бугун пойтахтимизда паралимпиячилар ўртасида Ўзбекистон чемпионатига старт берилди. Мазкур мусобақаларда мамлакатимизнинг барча худудларидан келган 200 нафардан зиёд спортчи енгил атлетиканинг қатор турлари бўйича ғолиблик учун кураш олиб борадилар. 

Икки кун давомида ўтказиладиган мусобақалар орқали мамлакатимизнинг бугунги кундаги етакчи паралимпиячилари аниқланиши билан бирга, Ватанимиз шарафини бўлажак йирик халқаро мусобақаларда ҳимоя қиладиган спортчилар ҳам саралаб олинади. 

Эслатиб ўтамиз, мамлакатимиз паралимпиячилари 2014 йилда қатор нуфузли мусобақаларда иштирок этадилар. Улар орасида энг йириги Жанубий Кореянинг Инчеон шаҳрида ўтказиладиган ПараОсиё ўйинларидир. 

Маълумки, Осиё ўйинларидан фарқли равишда ПараОсиё ўйинлари олдидан лицензион мусобақалар ўтказилади ва ана шу мусобақаларда йўлланмаларни қўлга киритган спортчилар ПараОсиё ўйинларида қатнашиш хуқуқига эга бўладилар. 

Айни пайтга келиб юртимиз паралимпиячилари мазкур ПараОсиё ўйинларига 9 та йўлланмани нақд қилиб қўйишган (шундан 7 таси енгил атлетикачиларга тегишли). Олдинда қатор лицензион мусобақалар мавжуд ва умид қиламизки Инчеонга йўл оладиган паралимпиячиларимиз сафи янада кенгаяди.