Боливия президенти Эво Моралес мамлакатнинг футбол бўйича биринчи дивизионида иштирок этувчи «Спорт Бойс» (Sport Boys) клуби билан бир йиллик шартнома имзолади. Бу ҳақда BBC News хабар бермоқда.

54 ёшли сиёсатчи ўзи иштирок этадиган ҳар учрашувда ўртача 20 дақиқани майдонда ўтказади, бироқ иш вақтининг тиғизлиги сабаб барча учрашувларда ҳам иштирок эта олмайди. Моралеснинг клубдаги маоши ойига 214 долларни ташкил этади.

Боливия раҳбарига 10-рақамли футболка топширилади. Президентнинг ўзи аъло даражадаги жисмоний ҳолатда эканлигини ва ўйнашга тайёрлигини маълум қилди.

Бунгача Моралес фақат журналистлар ва бошқа сиёсатчиларга қарши ўртоқлик учрашувларида футбол ўйнаганди. 2006 йили у рақиб жамоа дарвозабони бурнини синдириб қўйган, 2007 йили эса Боливияга баланд тоғликларда халқаро ўйинларни ўтказишни тақиқлашга қарши белги сифатида денгиз сатҳидан 6 минг метр баландликда бутун бир учрашув давомида тўлиқ майдонда ҳаракат қилганди.