“Насаф” – “Бунёдкор” учрашувидан кейинги матбуот анжуманининг биринчи қисмида “қалдирғочлар” устози иштирок этди.

- Учрашув ҳақида тўлиқ фикр билдириш учун уни видео тасмасини қайтадан кўриб чиқиб керак. Бугунги баҳсда бизнинг жамоада чарчоқ аломатлари борлигини яққол сезилди. Шунингдек, ўтказиб юборилган тезкор гол ҳам кўп нарсани ўзгартириб юборди.

“Ал-Ҳилол” билан бўлиб ўтган оғир ўйиндан кейин футболчилар 2 сутка давомида йўлда бўлишди. Тошкентга келиб, маълум вақт ухлаб олишди ва кейин поездга ўтириб Қаршига келдик. Футболда тактика ёки техника доим ҳам ғалаба омили бўлавермайди. Футболчиларнинг ўйин кунги ҳолати ҳам кўп нарсани белгилаб беради. Чарчаган инсон хато қилади, эхтиросларга берилади. Ўзини-ўзи бошқаролмай қолади. Айнан шу жиҳат эвазига ютқаздик.

Бизда ҳам имкониятлар бўлди. Бироқ стандарт вазиятларидан кўнгилдагидек фойдалана олмадик. Дарвозага якуний зарба берилаётганида футболчи эътиборлироқ ва аниқроқ ўйнаши керак. Масалан, Симоненко “Ал-Жаиш”га гол урган вазиятини эсланг. Бугун у худди шундай ҳолатда аниқ ўйнай олмади, - дейди Александр Геннадьевич.