Осиё чемпионати баҳсларига қизғин тайёргарлик кўраётган Ўзбекистон ёшлар (U-19) терма жамоаси шу кунларда Тошкентда навбатдаги ўқув-машғулотлар йиғинини ўтказмоқда. Машғулотлар билан бир қаторда Сергей Лушан шогирдларини назорат-синов учрашувларида синаб кўришга ҳам алоҳида эътибор қаратмоқда.

Шу мақсадда кеча Тошкент вилоятидаги «Дўстлик» стадионида ёшларимиз билан «Локомотив» жамоаси ўртасида ўртоқлик учрашуви ташкил этилди. Ўзбекистон кубоги-2014 нимчорак финалидан озод этилган темирйўлчилар учун ҳам бу назорат-синов ўйини «Олмалиқ»қа қарши кечадиган ўйин олдидан айни муддао эди.

«Локомотив»нинг етакчи футболчилари миллий терма жамоа йиғинига жалб қилингани боис мазкур ўйинда Вадим Абрамов асосан захирада қолиб кетаётган ва кам ўйин амалиётига эга бўлаётган спортчиларга ўзларини кўрсатиш имконини тақдим этди. Қизиқарли ва ҳужумкор руҳда ўтган ўйинда 4-3 ҳисоби қайд этилди, ёшларимиз фойдасига. «Локомотив»дан голларни Фарҳод Тожиев, Дониёр Усмонов ва Садриддин Абдуллаевлар киритишди. Шу ўринда айтиш керак, Ўзбекистон U-19 ёшлар терма жамоаси бунгача ўтказилган ўртоқлик учрашувларида «Бунёдкор» ҳамда «НБУ-Осиё» жамоалари устидан мос равишда 5-1 ва 7-0 ҳисобида ғалаба қозонишган эди.

«Локомотив» – Ўзбекистон (U-19) терма жамоаси – 3:4
Голлар: Ф.Тожиев, Д.Усмонов, С.Абдуллаев – З.Ўринбоев (пен), О.Шукуров (пен), И.Абдуллаев, Э.Шомуродов.
«Локомотив»: Темур Жўраев 46, Сардор Рахмонов, Евгений Гоголь, Салим Мустафоев, Жасур Ҳасанов (кичик), Икром Алибоев, Қувондиқ Рўзиев, Акмал Холматов, Карен Абрамов, Садриддин Абдуллаев, Фарҳод Тожиев.
Захирадан тушганлар: Илҳом Суюнов, Дилшод Жабборов, Иброҳим Рахимов, Александр Шадрин, Вячеслав Шевченко, Сардор Мирзаев, Дониёр Усмонов, Бобур Тиллабоев.