1 июнь – Болаларни ҳимоя қилиш халқаро кунига бағишлаб, республикамиз бўйлаб кўплаб спорт мусобақалари ташкил этилади.
Тошкент шаҳар футбол федерацияси Болаларни ҳимоя қилиш халқаро кунига бағишлаб, пойтахтимизнинг 4та мажмуасида тўртта мусобақа ташкил этмоқда. Бу мусобақаларнинг биринчисини ТшФФ 31 май (шанба) куни “Сергели Арена” спорт мажмуасида уюштирмоқда. “Соғлом бола йили” давлат дастури доирасидаги ушбу футбол бўйича блиц-турнир 2005-2006 йилларда таваллуд топган болалар ўртасида ўтказилиб, унда 4та клуб қатнашади: мезбон “Сергели Арена”, “Пахтакор”дан иккита жамоа ҳамда “Бунёдкор” клуби академияси тарбияланувчилари.
Мазкур блиц-турнирда ҳар бир жамоа бир-бирлари билан ўзаро биттадан – жами учтадан ўйин ўтказади. Ўйинлар 2та бўлимдан иборат бўлади, ҳар бир бўлим – 15 дақиқадан давом этади. Барча учрашувлар бирин-кетин ўтказилиб, ҳамма ўйинлар ўша куннинг ўзидаёқ якунланади.
Мусобақа якунига кўра, жамоалар Тошкент шаҳар футбол федерацияси (ташкилот вице-президенти – Маъмур Юсупов) томонидан эсдалик дипломлари ва кубоклар билан тақдирланадилар.
Беллашувлар 31 май куни эрталабки соат 8:30дан бошланади ва соат 11:30га қадар давом этади.
Беллашувларга ташриф буюришни хоҳловчилар учун эслатма: “Сергели Арена” манзили – машина бозордан ўтганда, Сергели 8-массив рўпарасида.
