Футбол бўйича Франция терма жамоаси ва Мюнхеннинг «Бавария» клуби ярим ҳимоячиси Франк Рибери жароҳати сабаб Бразилияда бўладиган ЖЧ-2014ни ўтказиб юборади. Бу ҳақдаги ахборотни, BBC Sport хабарига кўра, Франция терма жамоаси бош мураббийи Дидье Дешам тасдиқлаган.

31 ёшли футболчи 6 июнь, жума кунги машғулотларни белининг пастки қисмидаги жароҳат сабаб тарк этган.

«У машғулотларни тарк этишга мажбур бўлди, оғриқ жуда кучли эди», – деди Дешам машғулотлар якуни бўйича ўтказилган матбуот анжуманида.

Дешамнинг қайд этишича, Рибери бир неча ҳафта давомида энди шуғуллана олмайди, «майдонга тушиб, футбол ўйнаш ҳақида гапирмаса ҳам бўлади».

Куннинг иккинчи ярмида ўтказилган рентген текширувлари ҳам вазият жиддийлиги ва Рибери ЖЧ-2014ни ўтказиб юборишини тасдиқлаган.

Аввалроқ, «Лион» вакили Клемент Гренье ҳам жароҳати сабаб ЖЧ-2014да қатнаша олмаслиги маълум бўлганди.

Дешам бу футболчилар ўрнига Бразилияда «Саутгемптон» ярим ҳимоячиси Морган Шнайдерлин ва Монпелье ҳужумчиси Реми Кабелани олиб кетади.