"Нефтчи" - "Локомотив" (0:1) учрашувидан сўнг ташкил этилган матбуот анжуманининг иккинчи қисмида “Нефтчи” бош мураббийи Мурод Исмоилов қатнашди.
 - “Бунёдкор” билан ўйиндан кейин “Локомотив”га қарши жиддий тайёргарлик кўргандик" - дея гап бошлади Исмоилов.

- Бугунги ўйинда голли имкониятлар кам бўлишини билардик. Биз бундай имкониятлардан фойдаланиб қолишимиз керак эди. Ўйининг илк дақиқасида Рўзимбой Аҳмедов тепган тўпи тўсинга тегиб қайтди. Қайтган тўпни Абдуллоҳ Олимов совуққонлик билан якунлаши керак эди. Бироқ аниқлик етишмади.

Иккинчи бўлимда ҳам бир нечта голли вазиятлар бўлди. Афсуски, биринчи тайм сўнггиларида ўзимизнинг хатоимиз эвазига тўп ўтказиб юбордик.

Бугун йигитлар имкон қадар қўлдан келганича ҳаракат қилди. Бунинг учун уларга миннатдорчилик билдираман. Футболчилар берган кўрсатмаларимизни бехато бажаришга ҳаракат қилишди. Лекин юқорида айтиб ўтганимдек, биргина йўл қўйган хатоимиз туфайли мағлубиятга учрадик.

Аввал ҳам айтганман, бугунги ҳолатимизда “Бунёдкор” ва “Локомотив” сингари етакчи жамоаларга қарши баҳсларда очиқ футбол намойиш этсак қийналамиз.

Баҳона эмас-у, ҳисоблаб чиқсам, ихтиёримиздаги 10 нафар ўйинчидан турли хил сабабларга кўра фойдалана олмаяпмиз. Лекин бунинг ижобий томони шундаки, маҳаллий ёшларда имконият юзага келмоқда. Эътибор бераётган бўлсангиз, охирги ўйинларда кўпроқ ёшларга имконият бериб келмоқдамиз. Жавоҳир Расулов, Мурод Бобожонов, Отабек Зокиров каби ўйинчиларни кўрсатиш мумкин – дейди Исмоилов.