Бразилияда ўтаётган ЖЧ да "H" гуруҳида баҳс олиб бораётган Бельгия терма жамоаси илк турда Жазоир термаси устидан ғалаба қозонди ва ушбу учрашувда Маруан Феллайни ҳисобни тенглаштирган бўлса, Мертенс уч очко олиб келувчи гол муаллифига айланди. Ушбу учрашув ва Бельгиянинг ЖЧдаги иштироки ҳақида Феллайни ўз фикларини билдириб ўтди.

"Бельгия терма жамоаси ушбу Жаҳон чемпионатида ғолиб чиқиши учун барча имкониятларга эга. Агар ушбу фикрим ўз исботини топиб, биз чемпионатда зафар қучсак, сочимни олдириб ташлашга ваъда бераман".

Шунингдек, Феллайни ўзининг "Манчестр Юнайтед"даги тақдирига ҳам ойдинлик киритиб ўтди.

"Маруан Феллайни "МЮ" ва Бельгия терма жамоаси аъзоси. Манчестрликлар мени бир йил аввал сотиб олишди. Албатта у ерда яхши ва ёмон кунлар бўлди: мен жароҳат олдим, бош мураббий ўзгарди ва клуб ҳам яхши ўйнай олмади. Кейинги мавсумда кўрамиз, ўзимнинг энг яхши ўйинларимни кўрсатишга ҳаракат қиламан".

Феллайни илк турда Жазоир дарвозасига киритган голи ҳақида ҳам қисқача тўхталиб ўтди.

"Бу ўйин менинг танқидчиларимга жавоб деб ҳисобламайман ва ҳеч кимга ҳеч нарсани исботламоқчи эмасман. Менинг мақсадим оилам ва ватаним учун гол уриш. Жуда қийин мавсумни ўтказдим, бироқ ҳозир мен Жаҳон чемпионатидаман ва бор эътиборим ушбу мусобақага қаратилган".