Хитойда футбол бўйича Уругвай терма жамоаси ҳужумчиси Луис Суарес кўринишидаги очқичлар сотувга қўйилди. Бу ҳақда Sina.com хабар бермоқда.

Портал хабарига кўра, Хитойнинг энг йирик онлайн-бозори – Taobao’да Луис Суарес кўринишидаги очқич сотиб олиш таклифи берилган 20дан ортиқ натижа пайдо бўлган.

Ҳар бир эълонда бир хил расм кўрсатилган бўлса-да, маҳсулот учун таклиф қилинган нарх 888 юань (142 доллар)дан 9,9 минг юань (1,6 минг доллар)гача ўзгарган.

Шиша очишга мўлжалланган шундай очқичларни сотиб олишни таклиф қилаётган ишбилармонлардан бирининг сўзларига кўра, ҳозирча бу кўринишдаги тайёр маҳсулот йўқ.

«Бироқ маҳсулот ишлаб чиқарилиши бошланганидан сўнг, унинг нархи ҳозир айтилаётганидек қиммат бўлмайди, албатта», – дейди ишбилармон.

Унинг сўзларига кўра, ушбу маҳсулотни ишлаб чиқаришдаги энг асосий муаммо – қиёфага тегишли муаллифлик ҳуқуқи билан боғлиқ бўлади (маҳсулотда Луис Суареснинг қиёфасидан фойдаланиш ҳуқуқини сотиб олиш керак).

Бразилияда давом этаётган футбол бўйича ЖЧ-2014 гуруҳ босқичи доирасидаги Италияга қарши ўйинда Луис Суарес рақиб ҳимоячиси Жоржо Кьеллинининг елкасини тишлаб олганди.

Ушбу ҳолатни ўрганиб чиққан ФИФА футболчини терма жамоа миқёсидаги тўққизта ўйиндан четлатди, шунингдек, унга тўрт ой давомида футбол билан боғлиқ фаолият юритишни тақиқлади.