Футбол бўйича Мексика терма жамоаси бош мураббийи Мигель Эррера Бразилияда давом этаётган ЖЧ-2014 нимчорак финали доирасидаги Голландияга қарши ўйинни бошқариб борган португалиялик ҳакам Педро Проэнсанинг ҳаракатларини танқид остига олди. Бу ҳақда «Спорт-Экспресс» хабар бермоқда.

Эслатиб ўтамиз, Мексика ва Голландия терма жамоалари ўртасидаги учрашув 2:1 ҳисобида Европа вакиллари фойдасига ҳал бўлди. Ўйиндаги ғалаба тўпи 90+4-дақиқада Голландия терма жамоаси ярим ҳимоячиси Арьен Роббенга нисбатан ишлатилган қоидабузарлик учун белгиланган пенальтидан киритилди.

«Жаҳон чемпионатида ўтказган тўрт ўйинимиздан учтасида ҳакамлар расво даражада бўлди. Камерунга қарши ўйинда икки голимизни ҳисобга олишмади, Хорватия билан ўйинда эса рақиб дарвозасига пенальти белгиланмади», – деди Эррера.

«Энди эса Роббен уч марта «йиқилди» – натижада ҳакам голландиялик футболчига сариқ карточка кўрсатиш ўрнига, бизнинг дарвозамизга 11 метрлик жарима зарбасини белгилади», – дея қўшимча қилди мексикаликлар устози.

«Жаҳон чемпионати ўйинларига бетараф конфедерациядан ҳакамлар тайинлаш керак. Бизнинг ўйинимизда Жанубий Америка, Осиё ёки Африка вакили ҳакамлик қилиши мумкин эди. Сўнгги ўйинимизда барча баҳсли қарорлар Европа вакили фойдасига чиқарилди», – деди Мексика терма жамоаси бош мураббийи.

«Португалиялик бу ҳакам жаҳон чемпионати ўйинларида ортиқ ишламаслиги керак. Умид қиламанки, бу жентльмен, худди биз каби, энди уйига кетади», – дея қўшимча қилди Мигель Эррера.