Венгрияда йиғин ўтказаётган Ўзбекистон U-19 ёшлар терма жамоаси кеча Венгрия ёшларига қарши иккинчи ўртоқлик учрашувини ўтказди ва 2:2 ҳисобида дуранг ўйнади.

Равшан Ҳайдаров бош мураббийлигидаги Ўзбекистон U-19 ёшлари 6 июль куни навбатдаги ўқув-машғулот йиғинини ўтказиш учун Венгрияга учиб кетгани ҳақида маълумот берган эдик. Режага кўра, Будапештда 8 ва 11 июль кунлари Венгрия U-19 ёшлар терма жамоасига қарши иккита ўртоқлик учрашувини ўтказилиши керак эди. 8 июль, сешанба куни ҳар иккала терма жамоа ўзаро илк ўйинда майдонга тушишган ва унда 2:1 ҳисобида Равшан Ҳайдаров шогирдлари ғалаба қозонган эдилар.

11 июль куни терма жамоалар ўзаро иккинчи ўртоқлик ўйинида майдонга тушишди ва қизиқарли кечган учрашувда 2:2 ҳисобида дуранг ўйнашди. Ўзбекистон ёшлар терма жамоасининг голларига 4-дақиқада илк учрашувда дубл қайд этган Забиҳилло Ўринбоев ва 71-дақиқада Аслиддин Абдиевлар муаллифлик қилишди.

Ўзбекистон ёшлар терма жамоаси аъзолари 12 июль куни Будапештдаги йиғинини якунлаб Тошкентга қайтиб келади.

Эслатиб ўтамиз, Ўзбекистон U-19 ёшлар терма жамоаси шу йилнинг октябрь ойида Мьянмада бўлиб ўтадиган Осиё Чемпионати финал босқичида иштирок этади.

Ўртоқлик учрашуви.
Венгрия, Будапешт. 11 июль.
Венгрия U-19 - Ўзбекистон U-19 2:2
Голлар: Забиҳилло Ўринбоев (4), Аслиддин Абдиев (71)