Қозоғистонда ниҳоялаб бораётган “Президент Кубоги” мусобақасида кучлилар сараланиб, кутилмаган натижаларга ҳам гувоҳ бўлинмоқда.

Мусобақанинг бугунги беллашувларида тўрт нафар чарм қўлқоп усталаримиз рингга кўтарилишади.

Бугун, 49 килограммли моҳир боксчимиз Ҳасанбой Дўсматов ярим финалда қозоғистонлик Ержан Жўмарт билан куч синашади. Ҳасанбой бундан аввалги жангда кубалик Сантьяго Падронни сенсацион тарзда енгган эди.

52 килограммгача бўлган боксчилар беллашувида яна бир ёш боксчимиз Шахобиддин Зоиров навбатдаги учрашувини россиялик Гаврилл Поповга қарши олиб боради. Зоиров чорак финалда қирғизистонлик Азат Усеналиевни 2:1 ҳисобида таслим этганди.

69 килограмм вазн тоифасидаги жангларда, иқтидорли боксчиларимиздан, амалдаги Ўзбекистон чемпиони Исроил Мадримовнинг бу галги рақиби мусобақа мезбонларидан, амалдаги жаҳон чемпиони Данияр Елеусинов билан финал йўлланмаси учун кураш олиб боради.

75 килограммли боксчилар баҳсида кучли спортчиларимиздан бири Хуршидбек Норматов ҳам ярим финалда рингга кўтарилади. Унинг бу галги рақиби, жаҳон чемпионатлари иштирокчиси ва совриндори украиналик Дмитрий Митрофанов бўлади.

Норматов куни кеча бўлиб ўтган чорак финал жангида қозоғистонлик Сапарбай Айдаровни ўта мураккаб ва муросасиз кечган баҳсда мағлуб этган эди.