Осиё Футбол Конфедерацияси 2015 йили бўлиб ўтадиган U-16 ўсмир қизлар ва U-19 аёллар ўртасидаги Осиё Чемпионати финал босқичига мезбонлик қиладиган мамлакат номини тасдиқлади. Унга кўра, ҳар иккала ёш тоифасидаги ОЧ финал босқичи баҳсларига Хитой мезбонлик қилади.

U-16 ўсмир қизлар ўртасидаги Осиё Чемпионати баҳсларига Хитойнинг Вухан шаҳри мезбонлик қилади. Ушбу ёш тоифасидаги Осиё Чемпионати финал босқичи ўйинлари 2015 йилнинг 4-15 ноябрь кунлари бўлиб ўтади. Эслатиб ўтамиз, Ўзбекистон U-16 ўсмир қизлар термаси мазкур ОЧ финал босқичига чиқиш учун шу йилнинг октябрь ойида саралаш баҳсларида иштирок этадилар. Ўзбекистон U-16 ўсмир қизлар терма жамоаси саралашнинг «А» гуруҳида Шри-Ланка, Баҳрайн, Фаластин, Қирғизистон ва Тожикистон U-16 ўсмир қизларига қарши ўйнаши ҳақида хабар берган эдик.

U-19 аёллар ўртасидаги Осиё Чемпионати финал босқичи баҳслари эса 4-15 август кунлари Хитойнинг Нанкин шаҳрида бўлиб ўтади. Ўзбекистон U-19 аёллар терма жамоаси ҳам ОЧ саралаш баҳсларида иштирок этади. Унга кўра, Ўзбекистон U-19 ёшлари саралашнинг «A» гуруҳида Иордания, Ҳиндистон ва Ливан ёшлар терма жамоаларига қарши баҳс олиб боради. Саралаш ўйинларига 4-9 ноябрь кунлари Иордания мамлакати мезбонлик қилади.