АҚШнинг Южин шаҳрида енгил атлетика бўйича ўсмирлар ўртасида жаҳон чемпионати мусобақаларига старт берилди.

Билл Хейвард номидаги стадионда дунёнинг 167 мамлакатидан келган 1540 спортчи, шу жумладан, 829 йигит ва 711 қиз ўз маҳоратини намойиш этиши кутилмоқда. Улар орасида ўзбекистонлик уч истеъдод соҳиби ҳам бор.

200 ва 400 метрга югуришда Лилия Манасипова ўз омадини синаб кўради. Июнь ойи ўрталарида Осиё чемпионатида 400 метрга югуришда Лилия 54,11 натижа билан шахсий рекордини яхшилаб вице-чемпион бўлган эди. Южинда саралаш босқичида Манасипова 23 июль куни Тошкент вақти билан соат 23.35да йўлкага чиқиши кўзда тутилган.

200 метрлик масофада баҳслашувчилар орасида Осиё чемпионати бронза медали эгаси Нигина Шарипова ҳам бор.

Ҳар иккала вакиламиз омадини синаб кўрадиган саралаш босқичи 24 июль куни Тошкент вақти билан соат 23.35да бошланиши режалаштирилган.

Осиё чемпионати бронза медали соҳиби Тимур Хуснуллин узунликка сакраш секторида муносиб куч синашади деган умиддамиз. Уч хатлаб сакраш мусобақасининг саралаш босқичи 25 июль куни куни Тошкент вақти билан соат 22.45да бошланади.

Эслатиб ўтамиз, ўз вақтида баландликка сакраш секторида ҳамюртимиз Светлана Радзивил ўсмирлар ўртасида жаҳон чемпиони унвонини қўлга киритган эди. 2012 йили Испаниянинг Барселонасида ўтган аввалги турнирда ўзбекистонлик Суҳроб Ходжаев босқон улоқтириш бўйича бронза медали билан тақдирланганди.

Южиндаги чемпионат 27 июлда якунланади.

Омонбой Тўхтамирзаев