“Пахтакор”нинг келажаги порлоқ футболчиси дея эътироф этилган, ўсмирлар ҳамда ёшлар ўртасидаги жаҳон чемпионати иштирокчиси Аббос Махситалиев иккинчи даврани ижара асосида “Андижон” жамоасида бошлади. Иқтидорли бу футболчи негадир “Пахтакор”да рақобатга дош бера олмаяпти. Ваҳоланки, бундан бир-икки йил аввал уни “Пахтакор”нинг асосий ўйинчисига айланишини кутгандик. Биринчи даврада Аббос бирорта ҳам ўйинда майдонга тушгани йўқ ва асосий вақтини захирада ўтказди. Шу боис иккинчи даврада Максимилиан Фомин ва Абдулазиз Юсупов билан бирга Махситалиев ҳам ижарада ўйнашга қарор қилди. “Қизилқум”га қарши ўйин олдидан Махситалиев газета ва сайтимизга интервью берди.
- Аббос, дастлаб “Андижон”га ўтишингиз ҳақида суҳбатлашсак. Табиийки, бу кўпроқ ўйнаш мақсадида қилинган қарор. Шундайми?
- Ҳа, биринчи навбатда ўйин амалиётига эга бўлиш мақсадида “Андижон” жамоасига ўтдим. Чунки ҳозир мен учун энг муҳими ўйин амалиётидир. Шу боис “Пахтакор”дагилар билан маслаҳатлашиб мени ижарага беришларини сўрадим. “Андижон”га ўтсам ярим мавсум давомида кўпроқ ўйнаш имкониятига эга бўлишим мумкин. Бу ерда кўпроқ майдонга тушиб яхши формага киришни ўйлаб шундай қарорга келдим.
- “Андижон”га ўтишга қарор қилганингизда жамоани турнир жадвалида энг сўнгги поғонада тургани ва ҳозирги ҳолатини ҳам ҳисобга олдингизми?
- Тўғри, жамоа қандай вазиятда эканлигига эътибор қаратилди. Иккинчи давра бошланиши олдидан “Андижон”га бир қатор яхши савиядаги ўйинчилар таклиф этилиб таркиб кучайтирилди. Иккинчи даврада жамоа олий лигада қолиш учун жиддий курашишини инобатга олиб биз ҳам ёрдам беришга қарор қилдик. Қолаверса, бу йўлда жамоа бизга ҳам умид боғлагани ҳам ўтишимизда муҳим роль ўйнади.
- Биринчи марта “Пахтакор”дан бошқа жамоага ўтдингиз. Шу боис ўйинга киришиб кетишда муаммолар бўлмасмикин?
- Ҳаммаси яхши бўлади деган умиддаман. Бунинг устига “Андижон”га бир ўзим эмас, Максимилиан Фомин ва Абдулазиз Юсупов ҳам ўтишган. Улар билан болаликдан бери биргамиз. Албатта, бир нимага эришиш учун бошқасидан воз кечиш керак. Шунинг учун “Пахтакор”да захирада ўтиргандан кўра пастки жамоада бўлса ҳам ўйнашни лозим топдик. Учаламиз ҳам “Андижон”га фойда келтиришга ҳаракат қиламиз.
- Келишувга кўра “Пахтакор” – “Андижон” учрашувида майдонга тушмадинглар. Ўйин тўғрисида фикрингиз қандай?
- Тан олиш керак, айни пайтда “Пахтакор” анча кучли жамоа. Таркибда тажрибали ва иқтидорли ўйинчилар кўпчиликни ташкил этади. Шу сабабли ўйинда мезбонларнинг устунлиги барибир сезилди. Натижа ҳам шунга яраша бўлди деб ўйлайман. Лекин “Андижон” ҳам қўлдан келганича ҳаракат қилди. Янги жамоамда бир нечта футболчиларни майдонга туша олмагани ўз таъсирини ўтказди деб ўйлайман.
- Олдинда яна 12та учрашув турибди. Нима деб ўлайсиз, “Андижон” кучлилар сафида ўз ўрнини сақлаб қолишими мумкинми?
- Агар олий лигада қолиш учун имконият бўлмаганда жамоада бундай ўзгаришлар рўй бермасди. Таркибда ўзгаришларни амалга ошириб жамоа иккинчи даврага яхши тайёргарлик кўришга ҳаракат қилди. Худо хоҳласа, ҳаммаси яхши бўлади деган умиддамиз.
- Мухлислар эътиборига жуда эрта тушган Аббос Махситалиев нима учун “Пахтакор”нинг асосий ўйинчисига айлана олмади?
- Майдонга кимни тушириш ва кимга ишонч билдириш бош мураббийга боғлиқ. Албатта, ҳар қандай мураббий яхши формадаги ўйинчини таркибга киритишни хоҳлайди. Балки кам ўйнаётганимга ўзим сабабчидирман. Машғулотларда ишлашда сусткашликка йўл қўйиб формадан чиқиб қолгандирман. Лекин барибир кўп нарса ўйин амалиётига боғлиқ. Кули жамоада захирада ўтиргандан кўра оддий клубда ўйнасам ўзим учун фойдали бўлишини англадим.
- “Пахтакор”да мураббийлар сизга нима учун ишонч билдиришмаётганини қандай изоҳлашди?
- Ўзимга аниқ бир нима дейишгани йўқ. Лекин ўринбосарлар баҳсларида ўйинимни яхши баҳолаб, асосий таркибда ҳам ишонч билдиришларини ҳар сафар айтишарди. Албатта, захирада ўтириш ҳар қандай футболчини зиёнига ишлайди. Шунинг учун иккинчи даврада мени бошқа клубга қўйиб юборишини Самвел акадан қаттиқ илтимос қилдим. Бошида улар қўйиб юборгиси келмади. Аммо вазиятни тўғри тушунтириб, олдинда олимпия терма жамоасини муҳим баҳслар кутиб турганини ва унда қатнашишим учун кўпроқ ўйин амалиётига эга бўлишим кераклигини айтдим.
- Ўсмирлар ва ёшлар ўртасидаги жаҳон чемпионатларида иштирок этдингиз. Бундай нуфузли мусобақаларда қатнашиб ёшликдан кўпчиликни назарига тушиш футболчига босим юклайдими?
- Албатта, босим жуда катта бўлади. Терма жамоа миқиёсида эътибор қозониб кейинчалик кўринмай гап-сўз бўлади. Жаҳон чемпионатларини кўрган футболчидан кўп нарса кутишади. Аммо беш қўл баробар эмас. Футболда тепа ва пастликлар ҳам бўлади. Муҳими, тушкунликка тушмасдан олдинга қараб интилишда давом этиш керак. Ҳали ёшман ва футболда эришишим керак бўлган ютуқларим олдинда. Қолаверса, “Пахтакор”дан вақтинча кетдим. “Андижон”да кўпроқ ўйнаб ўзимни кўрсатиб “Пахтакор”га яхши формада қайтишни ният қилганман. “Андижон”га нафақат ўйнаш, балки жамоага ёрдам бериш мақсадида ҳам келганмиз. Бунинг учун бор имкониятимизни ишга соламиз.
- “Пахтакор”ни футболчилар етиштириб бериш фабрикасига қиёслашади. Жамоа сафида ҳар йили иқтидорли ёшлар кашф этилмоқда. Лекин “Пахтакор”да кимлардир ўйнаб кета олади, кимлардир эса йўқ. Мураббий академиядан етишиб чиқаётган ҳамма болаларни асосий таркибга кирита олмайди. Кимлардир ўйин амалиётисиз қолиб кетишга мажбур. Мана шундай футболчилардан бирга сиз ҳам айландингиз. Шунга қарамай, “Пахтакор” тўғри йўлдан кетяпти деб айта оласизми?
- Рақобат бор жойда ўсиш бўлади. “Пахтакор” академияси кучли ва ҳар йил асосий таркибга ўйинчилар етишиб чиқмоқда. Нима бўлганда ҳам жамоа тўғри йўлда деб ҳисоблайман. Чунки “Пахтакор”да кучли мутахассислар ишлайди. Буёғи эса футболчининг ўзига боғлиқ.
