Норвегиянинг Тромсё шаҳрида бўлиб ўтаётган Бутунжаҳон шахмат олимпиадасида кеча 6-тур ўйинлари бўлиб ўтди. Ўзбекистон эркаклар терма жамоаси Россия, аёллар терма жамоаси эса Уэльс билан баҳс олиб боришди.

Эркаклар
Олимпиадада 1-рақам остида тартибланган Россияга қарши баҳс анча қизиқарли кечди. Рустам Қосимжонов тажрибали Владимир Крамникни мағлуб этган бўлса, Марат Жумаев Петер Свидлер билан дуранг ўйнади. Антон Филиппов ва Жаҳонгир Воҳидов ўз партияларида мағлуб бўлишди. Натижада 1,5-2,5 ҳисоби қайд этилди ва терма жамоамиз илк марта мағлубият аламини тортди.

Ушбу мағлубият туфайли терма жамоамиз 9 очко билан жадвалда 15-ўринга тушиб кетди. 11тадан очкога эга бўлиб турган Озарбойжон ва Куба терма жамоалари жадвални бошқариб туришибди. Россия эса 3-ўринга чиқиб олди.

Қосимжонов бошчилигидаги терма жамоамиз 7-турда АҚШ (6-рақам) билан дона суришади.

Аёллар
Ўзбекистон аёллар терма жамоаси 6-турда ғалаба қозонди. Қизларимиз Уэльсни 3-1 ҳисобида мағлуб этишди. Моҳинур Қаҳрамонова ва Ольга Собирова ғалаба қозонишган бўлса, Сарвиноз Қурбонбоева ва Севара Боймуродова дуранг ўйнашди.

Ушбу ғалабадан кейин терма жамоамиз 8 очко билан 29-ўринга кўтарилишди. Қизларимиз 7-турда шунча очкога эга бўлиб турган Боливияга қарши дона суришади. Боливияликлар мусобақада 71-рақам остида тартибланишган.