Хитойнинг Ченгду шаҳрида футзал бўйича клублар ўртасида Осиё чемпионати бошланди. Қуръа натижасига кўра "А" гуруҳидан ўрин олган Ўзбекистон чемпиони "Локомотив" дастлабки турда ўтган йилги мусобақанинг бронза медалиги қўлга киритган Япониянинг "Нагоя Оушенс" клубига қарши майдонга тушди.

Биринчи бўлимдан сўнг японлар 2:0 ҳисобида олдинга чиқиб олишди. Иккинчи бўлимда Аҳад Юсупов шогирдлари вазиятни ўнглаш учун ҳаракат қилишди. Бироқ бўлим ўртасида бурчак тўпидан сўнг Константин Свиридов бош билан ўз дарвозасини ишғол қилиб қўйди. Натижада "темирйўлчилар"нинг вазифаси янада қийинлашди. Ўйин тугашига 3 дақиқа қолганида вакилларимиз қарши ҳужум уюштиришди ва Фарҳод Абдумавлонов ҳисобни биттага қисқартирди.

Қолган дақиқаларда бош мураббийимиз бешинчи ўйинчи тактикасидан фойдаланди. Бир вазиятда футзалчимиз яқин масофадан зарба йўллади, бироқ япон дарвозабони зарбани қайтарди.

Шундай қилиб, илк ўйинда "Локомотив" 3:1 ҳисобида имкониятни бой берди. Ўзбекистон чемпиони 2-турда мезбон жамоа — "Шенжен Нанлинг" билан баҳс юритади.