Озарбайжон премьер-лигасининг дебютанти "Араз-Нахчиван" клуби мамлакат чемпионатида қатнашмасликка қарор қилди, дея хабар беради 1news.az.
Клубнинг бу қарорига охирги турларда ҳакамларнинг жамоага зарари теккан хатолари сабаб бўлди.
Чемпионатнинг иккинчи турида Габаладаги ўйинда клубдагиларнинг фикрича, "Араз-Нихчиван"нинг дарвозасига нохолис пенальти белгиланган ва бу ўйин тақдирини ҳал қилган.
Тўртинчи турда "Сумгайит"га қарши учрашувда рақиб футболчиси дарвозага кириб кетаётган тўпни қўли билан қайтариб қолади, ҳакам эса бунга эътибор қаратмайди. Ўша ўйинда Омар Пашаев "Араз-Нахчиван"нинг "тоза" голини ҳисобга олмайди.
"Қачонгача ўйинларни ҳакамликдан хабари йўқ кишилар бошқаради, - дейилади аризада. - АФФА, ПФЛ ва ҳакамлар қўмитаси қаёққа қараяпти? Терма жамоа устози Берти Фогтс ҳар доим миллий жамоа учун 11 футболчи топа олмаслигидан нолийди. АФФА бунда воқеаларга кўз юмаверса Озарбайжон футболи ривожи ҳақида гап бўлиши мумкин эмас. Терма жамоага эса легионерларни чақираверишсин."
