7 сентябрь куни 18-турнинг кечиктирилган баҳсида "Пахтакор" "Олмалиқ" меҳмони бўлади.
Иккинчи даврани ҳозирча ғалабасиз ўтказаётган олмалиқликлар пешқадамлардан бирига қарши ўйинда ўз мухлислари олдида яхши ўйин намойиш этишга ҳаракат қилишлари турган гап. Игорь Шквирин бошчилигидаги жамоа ҳамиша етакчи клубларни мушкул ҳолатга тушириб қўйиши билан ажралиб туради.

Ҳар икки жамоа сафида дисквалификацияга учраган футболчилар йўқ. Мураббийлар барча асосий ўйинчилар хизматидан фойдаланиш имкониятига эгалар.

Ҳозиргача олий лигада ўтган 13 ўйиннинг 9тасида "Пахтакор", 3тасида "Олмалиқ" ғалаба қозонган. Бир бор дуранг қайд этилган. "Пахтакор" 19, рақиб 7 марта тўп киритган. Олмалиқдаги баҳсларда мезбонлар 2 бор зафар қучган, жамоамиз 4 марта ютуққа эришган. Биринчи даврадаги ўйинда Егор Кримецнинг ягона голи "шерлар"ни 3 очко билан таъминлаганди.
Ёшлар лигаси баҳси 6 сентябрь куни Олмалиқдаги "Металлург" стадионида 17:00да бошланади. Асосий жамоалар эса 7 сентябрь, якшанба куни ОКМК спорт мажмуасида соат 18:00да ўйинни бошлаб беришади.

"ОЛМАЛИҚ" - "ПАХТАКОР"
Ҳакамлар: Марат Исмоилов, Равиль Шояхметов, Руслан Серазитдинов, Дмитрий Пислегин (барчаси Тошкентдан).
Назоратчи: Сайфиддин Эрматов (Тошкент).