Қозоғистоннинг «Ордабаси» клуби бош мураббийи Саулюс Ширмялис «Локомотив»га қарши бўлиб ўтган ўртоқлик ўйинидан (2:1) кейин ўз фикрлари билан ўртоқлашди.

«Юзага келган танаффусни тўлдириш учун бизга ушбу ўйин керак эди. Бу ерга келишга ва биз билан ўртоқлик ўйинини ўтказишга рози бўлган "Локомотив" клубига миннатдорчилик билдираман. Терма жамоага футболчилар таклиф этилгани учун ҳар иккала жамоада йўқотишлар бор эди. Биринчи бўлимда жипслашган ҳолда ўйнаган бўлсак, иккинчи бўлимда ҳимоя қўрғонини бўшаштириб юбордик. Умуман олганда, назорат ўйини қизғин курашларга бой бўлмади. Лекин ҳар иккала жамоа ғалаба учун ўйнади, албатта. "Локомотив" жамоаси менга жуда ҳам ёқди. Уларнинг бош мураббийи Ўзбекистон терма жамоасида муваффақиятли фаолият  олиб борган. Бу жамоа бекорга Ўзбекистон чемпионатида пешқадамлар орасида бормаяпти. Уларнинг сафида ўзбек футболи тарбияланувчилари ҳаракат қилмоқда. Бу футболчилар атлетик жиҳатдан яхши тайёргарликка эга. Бу эса Ўзбекистон чемпионати учун унчалик хос бўлмаган ҳолат", - дейди "Ордабаси" бош мураббийи.