Ўзбекистон ўсмирлар терма жамоаси қитъа чемпионатининг чорак финалида Сурия билан баҳс олиб борадиган бўлди.

"D" гуруҳининг 3-тури доирасида сурияликлар бугун пешқадам Эрон билан баҳс олиб боришди ва 2:1 ҳисобида ғалаба қозонишди. Суриянинг 26 ва 40-дақиқасида урган голларига форслар 45-дақиқасида бир марта жавоб қайтаришди. Иккинчи бўлимга қўшиб берилган дақиқаларда Эрон ҳисобни тенглаштирганди, бироқ гол инобатга олинмади.

Қатар ва Саудия Арабистони ўртасидаги ўйинда эса 1:1 ҳисоби қайд этилди. Ўйиннинг 55-дақиқасида қатарликлар пенальтидан гол ура олишмади. Ўйин тугашига 4 дақиқа қолганида саудияликлар ҳисобни очишган бўлса, ўйинга қўшиб берилган 3-дақиқасида Қатар ҳисобни тенглаштирди. Ушбу дуранг ҳар иккала жамоани қаноатлантирмади.

Натижада Ўзбекистон ўсмирлар терма жамоаси чорак финалда Сурияга қарши баҳс олиб борадиган бўлди. Ўйин 14 сентябрь, якшанба куни соат 18:00да бошланади.

Ўсмирлар ўртасидаги Осиё чемпионатининг барча чорак финал жуфтликлари
14 сентябрь, якшанба
13:30. Жанубий Корея - Япония
13:30. Австралия - Малайзия
18:00. Ўзбекистон - Сурия
18:00. Эрон - Шимолий Корея