Жанубий Кореянинг Инчеон шаҳрида давом этаётган Осиё Ўйинлари футбол мусобақасида бугун 1/8 финалдан ўрин олган яна тўрт учрашув ўтказилади.
Миржалол Қосимов бош мураббийлигидаги Ўзбекистон терма жамоаси нимчорак финалда «А» гуруҳида иккинчи ўринни қўлга киритган Саудия Арабистони терма жамоасига қарши бугун майдонга тушади. «Goyang» стадионида бўлиб ўтадиган учрашув Тошкент вақти билан соат 16:00да бошланади.
Таъкидлаш жоиз, Ўзбекистон ва Саудия Арабистони терма жамоалари Осиё Ўйинлари футбол мусобақасида бунгача ўзаро бир маротаба учрашган. 1994 йили Хиросимада бўлиб ўтган Осиё Ўйинлари гуруҳ босқичида Ўзбекистон Саудия Арабистони устида 4:1 ҳисобида ғалаба қозонган эди. Шу тариқа, мазкур терма жамоалар бугун Осиё Ўйинлари футбол мусобақаси турнирида ўзаро иккинчи бор ўзаро майдонга тушадилар. Мусобақа тақвимига кўра, Ўзбекистон - Саудия Арабистони жуфтлиги ғолиби чорак финалда Ироқ - Тожикистон жуфтлиги ғолибига қарши майдонга тушади.
Маълумот ўрнида, 25 сентябрь куни Инчеонда 1/8 доирасидан ўрин олган дастлабки тўрт учрашув ўтказилди. Унга кўра, Япония, Жанубий Корея, Иордания ва Таиланд терма жамоалари чорак финал йўлланмасини қўлга киритишди.
Инчеон. Осиё Ўйинлари.
1/8 финал. 25 сентябрь
Жанубий Корея - Гонгконг 3:0
Иордания - Қирғизистон - 0:0 (0:0 асосий вақт, қўшимча вақт 2:0).
Таиланд - Хитой 2:0
Фаластин - Япония 0:4
1/8 финал. 26 сентябрь.
Ўзбекистон - Саудия Арабистони (16:00)
Ироқ - Тожикистон
КХДР - Индонезия
Вьетнам - БАА
