Жанубий Кореянинг Инчеон шаҳрида ўтказилаётган ПараОсиё ўйинларидан ҳушхабарлар келишда давом этмоқда.

Унда маълум қилинишича дзюдо кураши бўйича бошланган мусобақаларда бир йўла уч нафар спортчимиз ғолиблик шоҳсупасининг энг юқори поғонасига кўтарилишган.

Жумладан, вазни 52 кг.гача бўлган хотин-қизлар ўртасидаги мусобақада Ватанимиз шарафини ҳимоя қилган Севинч Саллаева барча рақиблари устидан ғалаба қозониб, ПараОсиё ўйинларининг олтин медалига сазовор бўлган.  

Эркаклар ўртасида ўтказилаётган мусобақаларда эса Шерзод Намозов (-60 кг) ҳамда Нурбек Бердиёров (-66 кг) ўз вазнларида Осиёнинг энг кучли полвонлари эканликларини амалда исботлашди.  

Шу тариқа, Ўзбекистон делегацияси ҳисобидаги медаллар сони 11 тага етди. Мардонавор спортчиларимиз айни пайтга келиб 9 та олтин, 1 та кумуш ва 1 та бронза медалига сазовор бўлиб, умумжамоа ҳисобида 41 давлат орасида 4-ўринда боришяпти.

Ҳамюртларимизга бўлажак мусобақаларда ҳам омад ва зафарлар тилаб қоламиз.