Тожикистоннинг "Помир" клуби Иттифоқ чемпонатининг Олий лигасида илк марта 1989 йили иштирок этиш бахтига муяссар бўлган. Орадан бир йил ўтиб душанбеликлар Москванинг "Спартак" жамоасини 5:1 ҳисобида мағлуб этишган.
Ушбу воқеаларга 25 йил тўлиши муносабати билан "Помир" ва "Спартак" фахрийлари Душанбе шаҳрида ўзаро ўртоқлик ўйинида майдонга тушишди. Мазкур ўйинга ўзбекистонлик Азамат Абдураимов ҳам таклиф этилди. Азамат 1991 йилда "Помир" шарафини ҳимоя қилган.
Тожикистон футбол федерацияси матбуот хизматининг хабар беришича, мазкур ўйин 4:4 ҳисоби билан якунланди. Абдураимов 3та гол уришга муваффақ бўлди. У голларининг иккитасини пенальтидан урди. Шунингдек, яна бир ўзбекистонлик футболчи — Валерий Кечинов "Спартак"нинг биринчи голига муаллифлик қилди. Шунингдек, Андрей Пятницкий москваликлар сафида ҳаракат қилди.
