Англия футбол ассоциацияси раҳбари совға қилинган соатларни қайтармагани учун раҳбарлик лавозимидан кетиши мумкин.
ФИФАнинг Этика қўмитаси Бразилияда ўтган жаҳон чемпионатида мезбонлар томонидан юқори мартабали меҳмонларга совға қилинган тилла соатларни эгаларига қайтариш борасида тавсия берган эди. Бироқ, айримлар қатори Англия футбол ассоциацияси раҳбари Грег Дайк ҳам қилинган совғани қайтаришдан воз кечган.
Шундан сўнг Этика қўмитаси “агарда совға қайтарилмаса лавозимидан кетиши мумкинлиги” ҳақида Дайкни огоҳлантирди. Маълумотларга кўра, жаҳон чемпионати пайтида Бразилия футбол конфедерацияси 65 нафар расмий шахсга ҳар бири қиймати 25 минг доллардан иборат деб эътироф этиладиган 65 та "Пармижани" соатини совға қилган экан. Дайк соатни қайтариш ўрнига унинг қийматида пул тўлашни таклиф этмоқда, ФИФА эса бунга рози эмас.
Эслатиб ўтамиз, бундан бир ойча аввал УЕФА президенти Мишель Платини ҳам совға қилинган соатни қайтармаслигини билдирган ва ФИФАнинг талабидан сўнг қайтаришга мажбур бўлганди.
