Маълумки, “Андижон” жамоаси келаси мавсумда ҳам олий лигада иштирок этади. Албатта, “Андижон” клубининг 50 йиллик юбилейига бу муносиб совға бўлди. Бунинг учун жамоа раҳбарияти ЎФФ мутасаддиларига миннатдорчилик билдирган ҳолда, уларга янги мавсумда “Андижон” бошқача ўйин кўрсатишини, бундан буён жамоа олий лигадаги намунали клублар қаторидан ўрин олишга интилишини маълум қилди.
Шу боис андижонликлар пухта қилиб 2015 йилги мавсумга тайёргарлик режасини тузиб чиқишди. Айни пайтда ҳали ҳеч бир жамоа чемпионат бошлангунига қадар қаерларда йиғинлар ўтказиши борасидаги режаларини оммага эълон қилмади. “Андижон” эса ўз режаларини жамоатчиликка тўла-тўкис етказишга қарор қилди.
Янги чемпионат бошлангунигача андижонликлар бешта ўқув-машғулот йиғинлари ўтказишни белгилаганлар. Дастлабки икки ҳафталик йиғин Андижонда ўтади. Бу йиғинда футболчиларнинг тикланиш жараёнига эътибор қаратилади. Янги йил байрамидан кейин жамоа яна Андижонда шуғулланади. Шундан сўнг тайёргарлик Тошкентга кўчади. Эътиборлиси, февраль ойида андижонликлар Туркияда йиғин ўтказишни режалаштиришган. Охирги йиғин эса яна пойтахтда бўлади.
“Андижон” жамоаси янги мавсумга мана бу график асосида ҳозирлик кўради:
1) 2014 йил 15-29 декабрь – Андижонда;
2) 2015 йил 4-18 январь – Андижонда;
3) 2015 йил 22 январь-4 февраль – Тошкентда;
4) 2015 йил 7-21 февраль – Туркияда;
5) 2015 йил 24 февраль-1 март – Тошкентда.
Учинчи йиғин якунида, яъни январнинг охири-февралнинг биринчи кунларида жамоа аъзолари ЎФФ қошидаги “Futbol-MED” тиббиёт марказида чуқурлаштирилган тиббий кўрикдан ўтишади.
Олинган маълумотларга кўра, 17 декабрь куни олий лига клублари ўртасидаги 2015 йилги чемпионат тақвимини тузиш учун қуръа ташланади. 24-миллий чемпионатнинг бошланиши эса 7-8 мартга мўлжалланмоқда.
