Тошкентдаги "Ўзбекистон" спорт мажмуасида бошланган футзал бўйича "Tashkent Cup-2014" халқаро мусобақасининг дастлабки баҳсида Ўзбекистон футзал терма жамоаси Беларусь билан дуранг ўйнади.
Биринчи бўлимда ҳар иккала жамоа ҳимояда яхши ўйнади ва дарвозалар дахлсизлиги сақланиб қолди. Иккинчи бўлим бошида Беларусь дарвозасига пенальти белгиланди. Дилшод Раҳмадов 6 метрли жарима зарбасини голга айлантира олмади — зарбани дарвозабон қайтарди.
Орадан кўп ўтмасдан Раҳматовнинг ўзи хатосини тўғирлади: у ўзи бошлаган ҳужумни якунига етказиб, ҳисобни очди. Шундан сўнг беларуслар ҳужумкорликни ошириши натижасида вакилларимиз ҳимояда ўйнашга мажбур бўлдилар. Орқа чизиқда йўл қўйилган кўплаб хатолар натижасида ҳисоб тенглашди. Фарҳод Абдумавлонов ўз дарвозасини ишғол қилиб қўйди. Қолган дақиқаларда ҳисоб ўзгармади.
Бироз аввал бўлиб ўтган ўйинда Қозоғистон Озарбойжон устидан 4:1 ҳисобида ғалаба қозонди.
Эртага Озарбойжон-Беларусь, Ўзбекистон-Қозоғистон ўйинлари бўлиб ўтади.
