"Реал Мадрид" клублар ўртасидаги жаҳон чемпионатининг дастлабки финалчисига айланди. ЕЧЛнинг амалдаги ғолиблари бугун бўлиб ўтган ярим финал баҳсида КОНКАКАФ минтақасидаги клублар ўртасидаги асосий мусобақа ғолиби — "Крус Асул"га ҳеч қандай имконият қолдиришмади.

Ўйиннинг 3-дақиқасидаёқ Роналду ҳисобни очиши мумкин эди. Унинг жуда яқин масофадан йўллаган зарбасини мексикалик дарвозабон Корона эгаллаб олди. Шунга қарамай, мадридликлар тезкор гол уришнинг уддасидан чиқишди. Серхио Рамос "стандарт"дан етказилган тўпни бош билан дарвозага йўллади. 36-дақиқада Карвахалнинг узатмасини Бенземага голга айлантирди. Орадан 2 дақиқа ўтиб "Реал" дарвозасига белгиланган пенальтини Херардо Торрадо (у "Вестерн Сидней"га пенальтидан 2та гол урганди) голга айлантира олмади. Касильяс зарбани қайтариб, кетма-кет иккинчи ўйинда пенальтини бартараф этди.

Иккинчи бўлимда "Реал" яна иккита гол урди ва ҳар иккала голга Роналду ҳаммуаллифлик қилди. Унинг узатмаларини Бэйл ва Иско голга айлантиришди. "Крус Асул" футболчиси Баррера ва "Реал" ярим ҳимоячиси Хедиранинг зарбалари дарвоза устунларига тегиб қайтганини таъкидлаш лозим.

Шу тариқа, "Реал" ғалабали ўйинлар сериясини 21та ўйинга етказиб қўйди. Анчелотти шогирдларининг финалдаги рақиби "Окленд Сити" ва "Сан-Лоренсо" (Аргентина) жамоалари ўртасидаги ўйинда аниқланади.

Клублар ўртасида ЖЧ, ярим финал
Крус Асул Мексика – Реал Мадрид Испания 0:4 (0:2) - (ОНЛАЙН ТРАНСЛЯЦИЯ)
Голлар: 0:1 – 15 Рамос, 0:2 – 36 Бензема, 0:3 – 50 Бэйл, 0:4 – 72 Иско.
Крус Асул – Корона, Домингес, Родригес, Пинто, Флорес, Бернардельо, Торрадо, Формика, Хименес (Фабиан, 65), Рохас (Валадес, 76), Павоне (Баррера, 65).
Реал Мадрид – Касильяс, Рамос (Варан, 64), Карвахаль, Пепе, Марсело, Ильярраменди, Иско (Хесе, 76), Бэйл, Кроос (Хедира, 73), Бензема, Роналду.
Огоҳлантиришлар: Рамос (39).