Олий лиганинг кейинги мавсумига қуръа ташлаш маросимидан кейин ЎзПФЛ раҳбарияти клублар вакиллари билан баъзи масалаларда алоҳида гаплашиб олишди. Биз журналистлар эса йиғилиш тугашини кутиб, Фарҳод Магометов билан суҳбатлашишга қарор қилдик.
Регламент ҳақида
Кейинги йилги регламентда жиддий ўзгаришлар йўқ. Энг муҳим янгилик — жамоалар сонининг 16тага кўпайтирилгани бўлди. Олий лига клублари учун бадал пули 110 миллион сўм қилиб белгиланган бўлса, Биринчи лига клублари учун бадал пули ўзгармасдан қолади. Олий лига клублари ўтган мавсум бўйича бадал пулларидан қарзлари қолмаган, фақат тартиб интизом қўмитасининг қарори билан жазо суммаларидан қарзлар бор. Дарвоқе, навбатдаги мавсумда жазо суммалари оширилади.
Келишилган ўйинлар ҳақида
Аҳрол Иноятов бошлилигида келишилган ўйинларга қарши кураш комиссияси жиддий ишга киришган. Клубларнинг барча футболчилари, мураббийлар, ҳакамлар, назоратчилар келишилган ўйинларга қарши кураш бўйича декларацияга имзо чекишади. Ушбу декларацияга имзо чекмаган шахс заявкадан ўтказилмайди. Бугунги йиғилишда клублари вакиллари билан бу ҳақда яна бир марта гаплашдик. Бу чоралар қанчалик самара беради, буни келаси мавсум сўнгида билиб оламиз.
Хориждан ҳакамлар таклиф этилиши борасида
2014 йилда иккита ўйинга хорижий ҳакамларни таклиф қилдик. Бундан қарорга ўзимиздан ўзимиз келмадик. Ижроқўм аъзолари билан маслахҳатлашган ҳолда шундай қарорга келинди. Муҳим ўйинлар пайтида Равшан Эрматов Ўзбекистонда эмасди, "Локомотив" эса ўйинни Коваленко бошқаришини истамади. Умуман олганда, ўзбекистонлик ҳакамларнинг савияси қитъада бошқа давлатлар ва қўшни мамлакатларнинг ҳакамларига нисбатан анча юқори. Фақат қолган ёш ҳакамларимизга бироз тажриба керак. Бизнинг бош мақсадимиз — фақат ўзимизнинг ҳакамларга ишонч билдиришдан иборат.
Комиссарлик иши ҳақида
Ҳозирги кунда Олий лига ўйинларига тайинланаётган ЎзПФЛ вакилларини комиссарлик билан адаштирмаслигингизни сўрайман. Боиси, комиссарнинг иши бошқа, бу мутахассисларнинг вазифаси бошқа. Мутахассисларимиз фақат ўз хонасида ўтирмасдан, жойлардаги ўйинларни, унинг атрофидаги воқеаларни ўз кўзлари билан кўришларини истаганим учун уларни ўйинларга юборяпман. Кейинроқ комиссарлар учун семинарлар ташкил қилиб, комиссарлар хизматидан фойдаланиш ниятимимиз бор.
Мухлисларнинг стадионга ташрифи ҳақида
Олий лига ўйинларининг стадионга ташрифи камайиб кетяпти, биз мухлисларни йўқотиб боряпмиз. Мухлисларга чиройли ўйин, ҳақиқий жанг керак. Ҳаммаси клубларга боғлиқ. Футболчилар, мураббийлар чиройли ўйин намойиш этишса, мухлислар стадионни тўлдиришади. ОФКдаги йиғилиш пайтида айрим мутахассислар мухлисларни стадионга чорлаш учун маркетинг-менежмент ишларини олиб бориш кераклиги ҳақида гапиришди. Шунда мен сўзга чиқиб, аввало мухлис учун чиройли ва шиддатли ўйин кераклигини, тилладан стадион қуриб, мухлисга пул берсанг ҳам ишқибоз ёмон ўйин учун ўйингоҳга келмаслигини айтдим. Менинг фикримни Эрон, Саудия Арабистони вакиллари қўллаб-қувватлашди.
"Кўчманчи" футболчилар ҳақида
Бир нарсани таъкидлаш лозим, ўзбек футболчиларига ўзларига ҳаддан ташқари юқори бериб юборишган. Қайсидир клуб бир сўм кўпроқ пул берса, ўша клуб ўтиб кетаверади. Футболчиларни мажбурлаб бир неча йиллик шартномага имзо чектиришдан фойда йўқ. Боиси, ўйинчи мажбурлаб ушлаб туриб бўлмайди. Аввало клуб раҳбарлари ва мураббийлар футболчиларни клубга садоқат руҳида тарбиялашлари лозим. Сўнгги пайтларга келиб футболчиларнинг ёппасига у клубдан бу клубга кўчиб ўтишлари анча камайди, лекин ҳали ҳам бор. Футболчи пулни ўйлашдан аввал ўзини яхши томонлама кўрсата олиши керак. Масалан, Алибобо Раҳматуллаев каби футболчиларнинг "Футбол шарҳи"га чиқиб, бўлар-бўлмас гапни гапиришлари кескин қаршиман.
Биринчи лига ҳақида
Тан олиш керак, Биринчи лиганинг ҳозирги формати ўзини оқламади. Шунинг учун бу мусобақа кичик ислоҳотларни бошлаймиз. 2015 йилда Биринчи лигада 20та жамоа қолдирамиз. Аммо формати ўша форматда ўтказамиз. 2016 йилда эса 16та ёки 18та клубни қолдирамиз ва улар икки даврали тизимда ўйнашади. Бу ҳақда ҳозирданоқ регламентга киритиб қўямиз.
