Тошкентнинг "Локомотив" жамоаси 20 декабрдан бошлаб янги мавсумга тайёргарлик жараёнини бошлаб юборди. Йиғинда терма жамоа сафида Австралияда бўлиб ўтадиган Осиё Кубогига тайёргарлик кўриш учун Бирлашган Араб Амирликларига жўнаб кетган "темирйўлчилар"дан бошқа барча футболчилар иштирок этмоқда.
"Локомотив"нинг якунланган мавсумда ижара асосида бошқа клублар шарафини ҳимоя қилган аъзолари ҳам жамоа сафига қайтиб, ҳозирда "темирйўлчилар" сафида машғулотларда иштирок этмоқда.
Хусусан, иккинчи даврани "Нефтчи" сафида ўтказган Сардор Мирзаев ҳамда Сардор Раҳмонов, шунингдек "Қўқон 1912" таркибида ажойиб ўйинлар намойиш этган Донёр Усмонов яна жамоа сафига қайтди. Шу билан бирга асосий таркиб машғулотларига аввалги мавсумни Ёшлар жамоасида ўтказган Икром Алибоев, Хуршид Мухторов, Сарвар Каримов каби футболчилар ҳам жалб этилган.
Аввалги мавсумнининг иккинчи ярмини жиддий жароҳати сабаб ўтказиб юборган 16-рақам соҳиби - Жасур Ҳасанов ўз жисмоний ҳолатини анча тиклаб олди ва у умумий гуруҳ билан шуғулланяпти. Мавсум аввалига қадар у майдонга тушишга тайёр бўлади.
Автоҳалокат туфайли анча вақт жамоа билан шуғуллана олмаган Иван Нагаев ҳам машғулотларда иштирок этмоқда. Ҳозирча у индивидул тарзда машқ қилаётган бўлса-да, тез орада умумий гуруҳга қўшилиши кутиляпти.
Машғулотлар кўтаринки кайфиятда ўтаётганини эса суратлардан ҳам сезиш қийин эмас.
Бош мураббий Вадим Абрамов оёғидан жароҳат олгани сабабли машғулотларни бевосита майдонда туриб ўтказиш вазифасини Марат Мифтахудинов бажармоқда.
Вадим Карленович эса барча жараённи майдон четидан туриб бошқариб бормоқда.
"Локомотив" янги йилга қадар машғулотларни Тошкентда олиб боради. Январ ойи аввалида эса Бирлашган Араб Амирликларига ўқув-йиғини ўтказиш учун жўнаб кетади.
