Сербия миллий терма жамоаси ва “Челси” жамоасининг асосий ярим ҳимоячиси бўлган Неманья Матичнинг укаси Македония терма жамоаси аъзосига айланди. Бу ҳақида Македония Футбол федерацияси раҳбари Илчо Георгиоскининг сўзларига асосланиб, “Reuters” агентлиги хабар берган.
“Урош терма жамоамиз учун керакли ўйинчи. У Сербия ёшлар терма жамоаси сафида 7та ўйин ўтказган, лекин энди у Македония фуқаролигини қабул қилиб, шу юрт термаси учун ўйнайди”, – дейди Георгиоски.
Македония терма жамоаси Евро-2016 ўйинларида қатнашиш учун саралаш босқичида “C” гуруҳидан ўрин олган ҳамда Словакия, Испания ва Украинадан кейин 4-ўринда бормоқда. Бу терма жамоадан қуйида эса Беларусь ҳамда Люксембург терма жамоалари жойлашган.
Маълумот учун, 24 ёшли Урош Матич Нидерландия чемпионатида қатнашувчи “НАК” жамоаси аъзоси ҳисобланади.
Ака-укаларнинг бошқа бошқа терма жамоалари сафида ҳаракат қилишлари жаҳон футболига бегона эмас. Хусусан, ганалик ака-укалар — Кевин Принц ва Жером Боатенгларнинг каттаси Гана учун ўйнаса, кичиги немис фуқаролигини қабул қилган ҳолда Германия терма жамоаси сафида майдонга тушишни танлаган. Шунингдек, бу ака-укалар икки терма жамоа ўртасидаги баҳсларда бир-бирига рақиб сифатида ҳаракат қилган.
