Сенегал терма жамоаси ҳужумчиси Садио Мане нега Африка миллатлар кубоги финалида Марокаш терма жамоасига қарши ўйинда ҳакамнинг адолатсиз қарори ортидан майдонни тарк этган жамоадошларини қайта ўйинга қайтишга кўндирганини тушунтирди.
Эслатиб ўтамиз, қўшимча вақтда ҳакам сенегалликлар дарвозаси томон жуда баҳсли пенальти белгилаган, шундан сўнг жамоа бош мураббийи футболчиларни майдондан олиб чиққан эди. Бироқ Мане уларни қайта майдонга чиқиб, ўйинни давом эттиришга рози қилди.
«Ҳакамлар ҳам хато қилиши мумкин, шунинг учун уларни айблаш тўғри эмас. Энг муҳими, мен буни дунёдаги барча мухлислар учун қилдим — улар ўйинни охиригача кўришни исташган», — дея Маненинг сўзларини келтиради The Touchline.
Сенегалликлар майдонга қайтгандан сўнг Браим Диас 11 метрлик жарима зарбасидан фойдалана олмади. Қўшимча бўлимларда Сенегал ғалаба голини уриб, совринни қўлга киритди.
