"Барселона"да "Манчестер Юнайтед"га тегишли бўлган ҳужумчи Маркус Рэшфордни сақлаб қолиш борасида жиддий ният бор. Вингер жорий мавсумни Каталонияда ижара асосида ўтказмоқда.
Krrish хабарига кўра, "кўк-анорранглилар" Рэшфорд трансфери учун "қизил иблислар"га 22 миллион евро миқдорида таклиф йўллаган. Келишув 18 миллион евро кафолатланган тўловни (уч йил давомида тўланади) ҳамда натижаларга боғлиқ 4 миллион евро бонусларни ўз ичига олади.
Маълум қилинишича, «Манчестер Юнайтед» бундай таклифдан қониқмаган ва ижара шартномасида аввалдан кўрсатилган 30 миллион евро эвазига тўлиқ сотиб олишни талаб қилмоқда. Ҳозирча клублар ўртасида келишувга эришилмаган, аммо музокаралар яқин ҳафталарда давом эттирилади.
«Барселона» сафида 28 ёшли Рэшфорд 29 та ўйинда майдонга тушиб, 8 та гол урди ва 11 та голли узатмани амалга оширди.
