Карло Анчелотти дам олиш кунлари Мадридга қайтди. Бразилия терма жамоаси бош мураббийи Испания Ла Лигасидаги "Реал" — "Леванте" ўйинини стадионда томоша қилди. Душанба куни италиялик мутахассис ижтимоий тармоқларда "Сантьяго Бернабеу"дан бир нечта суратларни жойлаб, уларни қуйидаги матн билан изоҳлади.
"Реал"нинг ғалабасини кўриш қандай қувонч! Ва бу ғалабани менинг вице-президентим ҳамда миллий терма жамоалар директори билан бирга нишонлаш янада ёқимли", — деб ёзди Карло Анчелотти.
Ёзда Карло Анчелотти қўл остида Бразилия терма жамоаси жаҳон чемпионатида иштирок этади. Мундиал гуруҳ босқичида бразилияликларнинг рақиблари Марокаш, Гаити ва Шотландия терма жамоалари бўлади.













