Кеча "Олмалиқ" жамоаси ўз шаҳрида навбатдаги ўқув-машғулот йиғини ўтказиш учун тўпланди.

Куннинг иккинчи ярмида ўтган машғулотларда 24 нафар футболчи иштирок этди. Шундан 13 нафари жамоанинг ўтган йилги аъзолари бўлса, қолган 11 нафари "Олмалиқ"қа таклиф этилган футболчилардир.

Ўтган мавсум жамоада тўп сурган футболчилар Умиджон Хонимқулов, Акмал Ортиқов, Никита Шквирин, Шоҳрух Эшбўтаев, Сарвар Жўраев, Азамат Исроилов, Абдуқаҳҳор Ҳожиакбаров, Дилявер Абибуллаев, Зоҳир Пиримов, Никита Павленко, Диёр Туропов, Зафар Полвонов ва Ислом Исоқжоновлар бўлса, таклиф этилганлар дарвозабон Тимур Ғаниев (Андижон), ҳимоячи Акмал Бозоров (Динамо), ярим ҳимоячилар Муҳаммад Исаев, Элбек Очилов, Ғулом Ўрунов (Динамо), Санъат Шихов (Динамо), Жаҳонгир Абдумўминов (Машъал), ҳужумчилар Абдулатиф Абдуқодиров (Андижон), Беруми Абдунабиев (Оқ-тепа), Маъруф Тиллаев (Қизилқум) ва Дониёр Исмоилов (Зомин)лардир. Баъзи сабабларга кўра Абдумалик Тошпўлатов, Қадамбой Нурметов, Саламат Қуттибоевлар кечаги машғулотларда иштирок эта олишмади.

Жамоани ёш ҳужумчи Шариф Мирзаев тарк этди. У ўз имкониятини бошқа жамоада синаб кўришни хоҳлади. Бунга жамоа раҳбарияти монеълик қилмади.

Биринчи йиғинда қатнашган баъзи футболчилар ёшлар жамоаси машғулотларига ўтказилди. Ёшлар жамоаси машғулотларида 30дан ошиқ футболчи машғулотларга киришди. Ёш футболчилар танлови бир неча босқичда олиб борилади. Назорат ўйинлари орқали ажратиб олинган энг яхши футболчилар якуний рўйхатдан ўрин олади.