ФИФА дунё терма жамоаларининг 2015 йилдаги илк рейтинг жадвалини эълон қилди. Унга кўра, Ўзбекистон терма жамоаси 3 поғона кўтарилди ва 71-ўринни банд этди.

Терма жамоамиз Иордания, Ироқ (2 марта) билан ўртоқлик ўйинларида ижобий натижага эришгани боис бироз юқорига силжишга муваффақ бўлди. Эрон (51), Япония (54) ва Жанубий Корея (69) терма жамоалари аввалги рейтингга нисбатан ўз ўринларини ўзгартиришмаган ва Осиёнинг энг яхши уч жамоаси бўлиб туришибди. Ўзбекистон эса қитъада улардан кейин тўртинчи ўринни эгаллаб турибди.

Осиё кубоги-2015даги дастлабки рақибимиз — КХДР 150-ўринда қайд этилган бўлса, Хитой бир поғона юқорилаб, 96-ўринни банд этган. Саудия Арабистони эса 102-ўриндан қўзғалмаган.

Иордания терма жамоаси бирданига 12 ўрин "шўнғиган" бўлса (93-ўрин), Баҳрайн бирданига 12 поғона кўтарилган (110-ўрин). Ушбу жамоалар бу галги рейтингда энг кўп кўтарилган ва энг кўп пастлаган жамоалар сифатида қайд этилишди. Осиё кубоги мезбони — Австралия 100-ўрин билан мусобақани бошлайдиган бўлди.

Рейтингни Германия терма жамоаси бошқаришда давом этмоқда. Аргентина, Колумбия, Бельгия, Голландия, Бразилия, Португалия, Франция, Испания, Уругвай терма жамоалари Топ-10га киришган. Умуман олганда, жадвалнинг дастлабки 45та поғонасида ҳеч қандай ўзгариш юз бермаган.

Жадвалнинг тўлиқ кўриниши билан ФИФА расмий сайтида танишиб олишингиз мумкин.