Бугун Ўзбекистон - КХДР ўйинида терма жамоамиз сардори Сервер Жепаровнинг узатмасидан кейин Игорь Сергеев дарвозани ишғол қилганидан хабарингиз бор.

Жанубий Кореяда жуда катта обрў-эътибор қозонган Сервер Жепаровнинг ўйиндаги фаоллиги ҳақида бугун корейс нашрлари исталганча мақтовларни ёғдирмоқда. Осиё кубогида иштирок этаётган саноқли Кей-лигачилардан бўлганлиги туфайли Серверни Жанубий Корея чемпионатида ўсишга эришганлигини алоҳида таъкидлашмоқда. Жумладан, "МК Спортс" нашри у ҳақида қуйидагиларни ёзди:

"Бугун Сервер Жепаров ўз номини яна оқлади. Ўтган мавсум кей-лигада "Футболчи эмас!", деган "қора ном" ёпиштирилган айнан Сервер эмасмиди? 2014 йилги мавсумда кей-лигада 7 та гол ва 3 та голли узатмани амалга ошириб, "Сеонгнам"да порлади. Лекин шундай бўлса-да сеонгнамликлар унинг юқори маошини "кўтара олмасликлари" туфайли шартномани узайтирмади. Жепаров Осиё Кубогида ўзининг маошию маҳоратини тўлиқ оқлаяпти. Сервер - "булутли ва хира осмонда ҳам энг порлаган юлдуз".

Яна бир корейс нашри "Бест Элевен" эса: "Кей-лигада ўткирлашган Сервернинг чап оёғи Австралияда ҳам рақибларни бирма-бир "кесмоқда", деб ёзса, "Inter Football" нашри терма жамоамиз сардорини "Чап оёқли сеҳргар", деб атаган.

Умуман олганда, корейс ОАВлари кей-лигага бўлган қизиқишни янада ошириш мақсадида ўз чемпионатлари тарғиботини фаол олиб боришмоқда.

Маълумотларга қараганда, бу йилги Осиё Кубогида Кей-лигада тўп сурувчи 7 нафар футболчи қатнашмоқда: Жунг Сонг Рёнг ("Сувон"), Хан Кё Вон ("Чонбук"), Ча Ду Ри ("Сеул"), Ли Жонг Хёб ("Сангжу"), Ким Сеунг Гю ("Улсан") - барчаси Жанубий Корея терма жамоасида ўйнашса, Вилкинсон ("Чонбук" ва Австралия), Сервер Жепаров ("Сеонгнам" ва Ўзбекистон)лар ҳам кей-лига номи остида қайд этилишган.

Отабек Йўлдошев
Жанубий Корея, Сеул