Иордания шаҳзодаси Али бин Ал-Ҳусайн 2015 йилда бўлиб ўтадиган Халқаро футбол уюшмалари федерацияси (ФИФА) президенти сайловларида ғолиб чиқса, ташкилотни ислоҳ қилиш бўйича ўзининг 10 йилга мўлжалланган дастурини амалга оширади. Бу ҳақда BBC News ахборот берди.
Ал-Ҳусайн ФИФА президенти лавозимига ўз номзодини қўймоқчи.
“Фикримча, бизнинг ҳаракатларимиз очиқ бўлиши керак, – дейди Ал-Ҳусайн. – ФИФА ҳамма нарсани ҳам айтавермай, сир тутадиган ташкилот, лекин биз ўзимизга ишониб, барча учун очиқ бўлишимиз керак. Яқин ойларда мен ФИФА аъзолари билан суҳбатлашиб, уларнинг таклифларини эшитмоқчиман. Мен ўз шартларимни қўймоқчи эмасман. Менда амалга оширмоқчи бўлган баъзи фикрлар бор, бироқ бундан олдин мен бу ҳақда ҳамкасбларимнинг фикрини билмоқчиман”.
ФИФА президенти лавозимига сайловларда иштирок этишга қарор қилган Ал-Ҳусайн ҳозирги пайтда ушбу ташкилотнинг вице-президенти лавозимида фаолият юритади ҳамда Иордания ва Ғарбий Осиё футбол федерацияси раҳбари ҳисобланади.
ФИФА президентига сайловлар 2015 йилнинг май ойида бўлиб ўтади. Бу лавозимга шунингдек ФИФАнинг амалдаги раҳбари Йозеф Блаттер ва унинг собиқ бош котиби Жером Шампанлар даъвогарлик қилмоқдалар.