Бугун Жанубий Кореянинг «Ульсан Хёндэ» клуби "Ўзбекистон футболининг қаҳрамони Сервер Жепаров билан шартнома имзоланди", дея эълон қилди.

Одатда, Жанубий Корея клублари хорижий йиғинга кетишдан аввал барча трансфер ишларини якунларди. Аммо ҳозирда «Ульсан Хёндэ» аъзолари Таиландда ўқув-йиғин машғулотларини ўтказаётган бир вақтда клуб Сервер Жепаров ва Жанубий Корея ёшлар терма жамоаси аъзоси Ли Чанг Йонг билан шартнома имзолади.

Бош мураббий Юн Жонг Хван: "Сервер Жепаров қанотларда ҳам, марказда ҳам бирдек ҳаракатлана оладиган футболчи. Бунинг устига у жамоани ғалабаларга етаклай олади. Унинг тажрибаси жамоамизга асқотишига ишонаман", дея ушбу келишувдан ҳурсандлигини яширмади.

Ўз навбатида Сервер Жепаров: "Мен «Ульсан» билан шартнома имзолаганимдан жуда хурсандман. Бу жамоа билан одатдаги мақсадим - совринларга эга чиқишни истайман. Жамоа мухлисларидан стадионимизни тўлдириб бизни қувватлашларини сўрайман", - дея фикр билдирди.

Ҳозирча «Ульсан Хёндэ» Жепаров билан қанча муддатга шартнома тузилганлигини маълум қилмаган. Эслатиб ўтамиз, «Ульсан Хёндэ» клуби 2014 йилги мавсумда кей-лигада 6-ўринни эгаллаган. Корейс ОАВлари хабарига кўра, ўтган икки мавсумни Жанубий Кореянинг бошқа клуби "Сеонгнам"да ўтказган Жепаров 2 йил давомида клуби сафида 55 ўйинда майдонга тушиб, 13 та голга муаллифлик қилган ҳолда 5 та голли узатмани амалга оширган.
Отабек Йўлдошев
Жанубий Корея, Сеул