Австралиянинг Сидней шаҳрида бўлиб ўтган Осиё Кубоги-2015 финалида Австралия ҳамда Жанубий Корея терма жамоалари баҳси якунлангач, турнирнинг ёпилиш маросими бўлиб ўтди.
Унда финалда мағлуб бўлган кореяликларга кумуш медаллар, ғолиб мезбонларга эса кубок ҳамда олтин медаллар топширилди.
Маросимда шунингдек, турнирда ўзини кўрсатган бир қанча футболчиларга шахсий номинациялар бўйича совринлар берилди.
Жумладан, “фейр-плей” бўйича энг яхши жамоа учун Epson фирмаси таъсис этган совринга Австралия терма жамоаси муносиб кўрилди.
Турнирнинг энг яхши дарвозабони жамоаси билан финалгача етиб келиб, чемпион бўлган австралиялик Метью Райан бўлди.
Шунингдек, турнир давомида 5та голга муаллифлик қилган Али Мабҳут “энг яхши тўпурар”га айланиб, ташкилотчиларнинг махсус совринига эгалик қилди.
Осиё Кубогининг энг яхши ўйинчиси сифатида, Австралия терма жамоасининг ёш футболчиси, турнир кашфиётига айланган Массимо Луонго деб топилиб, унга Тоyota компанияси тақдим этган соврин топширилди.
