"Бунёдкор" ва "Ал-Жазира" жамоалари ўртасидаги ўйиндан кейинги матбуот анжуманига дастлаб абу-дабиликлар бош мураббийи Эрик Геретс ташриф буюрди.
— Биринчи бўлимда асосий эътиборни ҳимояга қаратиб, тўп назорат қилишга ҳаракат қилдик. Иккинчи бўлимда гол ўтказиб юборганимиздан кейин ҳужумкор ўйнашга ўтдик. Ҳимоядаги хатолар оқибатида бугун гол ўтказиб юбордик, — дея кириш сўзи билан бошлади бельгиялик мутахассис.
— "Бунёдкор" бугун ниманинг эвазига ғалаба қозонди деб ўйлайсиз?
— "Бунёдкор" таркибидаги 4-5 нафар тезкор футболчи бугун яхши ўйнади. Улар бугун натижага жиддий таъсир кўрсата олишди.
— Биз бугун кучли "Ал-Жазира"ни кўрмадик. Асосий эътибор БАА миллий чемпонатига қаратилганми?
— Йўқ, бундай эмас. Биз бугун ғалаба учун ўйнадик. Ҳар иккала бўлим ҳужум қилдик. Ғалаба учун ҳаракат қилдик.
— Вучинич нима учун бугун ўйнамади?
— У бир ҳафта ичида 3та ўйинда майдонга тушганди. Шунингдек, паспортини алмаштириш учун Черногорияга бориб келди. Бунинг учун уёққа 7 соат, ортга 7 соат давомида учди. Унда чарчоқ йиғилиб қолганди.
— Ҳакамлик борасида нима дея оласиз?
— Биз билан боғлиқ вазиятда ҳакам қизил карточка берди, бироқ ҳудди шундай вазиятда у "Бунёдкор" футболчисига сариқ карточка берганди.
— Бугунги натижа кейинги фаолиятингизга таъсир қиладими?
— Бундай деб ўйламайман, жамоамиз миллий чемпионатда яхши ўйин кўрсатяпти. Бугунги мағлубият туфайли истеъфога чиқмасам керак. "Ал-Жазира"да фаолиятимни давом эттираман.
