Мюнхеннинг “Бавария” жамоаси бош мураббийи бўлган испаниялик мутахассис Хосеп Гвардиола билан йўл транспорт ҳодисаси юз берди. Бу ҳодиса 2 март куни юз берган, аммо бу ҳақидаги хабар бугун маълум қилинган. Бу ҳақда The Daily Mirror хабар тарқатди.
Хабарда айтилишича, 2 март куни Мюнхен йўлида Audi RS6 русумидаги автомобилида ҳаракатланаётган Гвардиола олдиндаги машинага бориб урилган. Ҳодиса оқибатида ҳеч ким шикастланмаган. Гвардиола бу вазиятда масалани иккинчи ҳайдовчи билан ўзаро, полиция аралашувисиз ҳал қилишга уринган. Гувоҳларнинг айтишича, у иккинчи ҳайдовчи билан жуда хушмуомалалик билан гаплашган, лекин тез орада воқеа жойига йўл ҳаракатини назорат қилувчи ходимлар етиб келишган. Бундан кейинги жараёнлар маълум эмас.
Маълумот учун, Хосеп Гвардиола 2013 йилдан бери “Бавария” жамоаси бош мураббийи сифатида ишлаб келмоқда. У немислар жамоаси билан Германия чемпионати, мамлакат Кубоги, УЕФА Суперкубогини қўлга киритган.