Икки нафар американча футбол билан шуғулланган спортчи – бир йил аввал фаолиятини тугатган Сидни Райс ва ҳозирда “Нью-Йорк Жайантс” жамоасида ўйнайдиган Стив Уэзерфорд ўз ўлимларидан кейин мияларини тадқиқ қилишда фойдаланиш учун рухсат беришди. Бу ҳақда BBC Russian‎ хабар берди.

Спортчилар бу каби биологик материаллар тиббиёт ходимларига спорт жароҳатлари ва бош мия касалликларини тадқиқ қилиш учун зарурлигини айтишиб, бу ишлари билан бошқа ўйинчиларга ўрнак бўлишга ҳаракат қилганларини таъкидлашган.

Ўтган йилнинг ноябрида 20 мингга яқин собиқ ўйинчи фаолиятлари давомида олган бош жароҳатлари туфайли АҚШ Миллий футбол лигасига гуруҳли тарзда даъво аризаси беришган. Спортчилар ўз соғлиқларига зиён етгани учун ташкилотдан товон пули тўлашини талаб қилишган. Даъво бўйича тўловлар миллиард доллардан кўпроқни ташкил қилиши мумкин.

Маълумот учун, 28 ёшли Райс “Миннесота Вайкингс” ва “Сиэтл Сихокс” жамоалари сафида ўйнаган. Футболчи ўтган йилнинг июнида фаолияти давомида олган кўп сонли мия чайқалишларидан кейин ўз фаолиятини якунлашга мажбур бўлган.