Ispaniyaning La Liga chempionati Xitoyning Migu striming platformasi bilan tuzilgan yirik media va tijorat shartnomasidan ayrilishi mumkin. Bunga Madridning «Real» klubi fransuz hujumchisi Kilian Mbappe atrofidagi vaziyat sabab bo‘lgan. Bu haqda Ispaniyaning Vozpópuli nashri xabar berdi.
Manba ma’lumotiga ko‘ra, Ispaniya chempionati rahbariyati Migu platformasi bilan 2030 yilgacha amal qiluvchi uzoq muddatli shartnomaga ega. Kelishuv shartlariga binoan, La Liganing Osiyo bozoridagi translyasiyalardan oladigan umumiy daromadi 400 mln yevroni tashkil etishi kerak edi.
Biroq yulduz hujumchining Xitoy media makonida salbiy munosabatga duch kelishi ortidan foydali kelishuv xavf ostida qoldi. Bunga Mbappening yaqindagi hazillaridan biri sabab bo‘lgan.
Kilian Mbappe o‘zining sevimli memi haqida gapirar ekan, unda o‘zi «xitoylik diktator qiyofasida» tasvirlanganini aytgan. Bu orqali u Mao Szedunni nazarda tutgan.
Xitoylik hamkorlar ushbu holatga salbiy munosabat bildirishgan va to‘lovlarni muzlatib qo‘yish yoki shartnomani butunlay bekor qilish imkoniyatini jiddiy ko‘rib chiqishmoqda.
Agar kelishuv bekor qilinsa, bu Ispaniya chempionati rahbariyati uchun katta moliyaviy yo‘qotishlarga olib kelishi mumkin.
