Janubiy Koreyaning “ Sports Seoul” nashri xabariga ko‘ra, koreyslar yurtida o‘zbekistonlik futbolchi paydo bo‘lishi mumkin.

Janubiy Koreyaning Key-liga Chellenjida (1-liga) qatnashuvchi “Ansan Griners” klubi O‘zbekiston terma jamoasi a’zolaridan birini sotib olish harakatida va muzokaralar yakuniy bosqichda turibdi. Klub chempionatda o‘ynashga ruxsat etilgan 4 nafar chet ellik futbolchidan 2 nafarini osiyolik futbolchilar bilan to‘ldirish harakatida.

Gazetaning yozishicha, Ansan shahri Janubiy Koreyaning eng sanoatlashgan hududlaridan biri sanaladi va bu yerda 80 mingdan ortiq chet ellik ishchilar yashab, mehnat qilishadi. Bu shahardagi chet ellik ishchilar soni bo‘yicha Xitoy yetakchilik qilsa, ikkinchi o‘rinda O‘zbekiston turibdi. Tomoshabinlar oqimini ko‘paytirish bo‘yicha ish olib borayotgan klub, xitoylik va o‘zbekistonlik ikki nafar futbolchini o‘z safiga qo‘shish niyatida. 8 dekabr kuni klubda ko‘rikdan o‘tishga kelgan Vetnam olimpiya terma jamoasi a’zosi hisoblangan Le Douk Luong jamoa murabbiylarida iliq taassurot qoldira olmadi va futbolchiga javob berilgan.

Ansanliklar matbuot xizmatining tasdiqlashicha, klub O‘zbekiston terma jamoasiga nomzod futbolchi bilan kelishuvga erishgan va yaqin kunlarda futbolchi klub ixtiyoriga yetib kelishi kutilmoqda. Lekin jamoa hozircha o‘zbekistonlik futbolchining nomini sir tutmoqda.

Eslatib o‘tamiz, “Ansan Griners” klubi “Ulsan Dolgore” klubi chetlatilgach, 1-ligaga berilgan yo‘llanmaga ega bo‘ldi va yangi mavsumga qizg’in hozirlik ko‘rmoqda.

Koreys OAV ma’lumotlari asosida Otabek Yo‘ldoshev tayyorladi.