Eron va Marokash milliy terma jamoalari o‘rtasidagi o‘rtoqlik uchrashuvi bekor qilindi. Dastlabki kelishuvga ko‘ra, o‘yin 6 yanvar kuni BAAning Dubay shahridagi "Al-Ayn" klubiga tegishli stadionda o‘tkazilishi kerak edi.

Ma’lumotlarga qaraganda, BAA futbol federasiyasi o‘yinni muxlislarsiz o‘tkazishga ruxsat bergan. Eronlik ko‘plab muxlislar bu o‘yinga tashrif buyurishni istashgan. Katta ehtimol bilan shu sababga ko‘ra o‘yin bekor qilingan.

Shunga qaramay, Karlos Keyrush jamoa 2 yanvar kuni Dubayda yig‘in boshlaydi va u bir hafta davom etadi. Yig‘in davomida forslar o‘rtoqlik o‘yini o‘tkazishmaydi.

Eron terma jamoasi 23 mart kuni safarda Qatar, 28 mart kuni Tehronda Xitoyga qarshi bo‘ladigan o‘yinlarga tayyorgarlik maqsadida yanvar oyi boshida yig‘in tashkil qiladi.

JCH-2018 Osiyo mintaqasidagi saralashda Eron terma jamoasi 11 ochko bilan guruh karvonboshisi bo‘lib turibdi. Janubiy Koreya 10 ochko bilan ikkinchi, O‘zbekiston esa 9 ochko bilan 3-o‘rinni band etgan.

Eslatib o‘tamiz, Eron va O‘zbekiston terma jamoalari o‘rtasidagi o‘yin bir kun oldinga surildi va 12 iyun kuni bo‘lib o‘tadigan bo‘ldi.