Sports.uz 2016 yilgi mavsum yakunlarini hisob-kitob qilib, oliy ligada to‘p surgan katta yoshli futbolchilar reytingini tuzdi.
Eng keksa futbolchilar
1. Mo‘ydin Mamazulunov («Navbahor»|«Olmaliq»). 32 yosh. 25ta o‘yin, 6ta gol.
So‘nggi mavsumlarda ajoyib sermahsullik namoyish etayotgan hujumchi 2016 yili ikkita jamoa safida o‘ynab, jami 6ta gol urdi. «Olmaliq» libosida 2ta, «Navbahor»da esa 4ta golli pas muallifiga aylangan.
2. Nosir Otaqo‘ziyev («Qo‘qon-1912»). 32 yosh. 26ta o‘yin, 7ta gol.
O‘z vaqtida O‘zbekiston chempionati to‘purariga aylangan Nosir Otaqo‘ziyev o‘tgan mavsumni «Qo‘qon-1912»da o‘tkazdi. 26ta o‘yinda raqiblar darvozasini 7 marta ishg‘ol qilgan forvard klubining eng yaxshi goleadori nomiga ega bo‘ldi.
3. Server Jeparov («Lokomotiv»). 34 yosh. 23ta o‘yin, 7ta gol.
Osiyoning ikki karra eng yaxshi futbolchisi 2016 yili «Lokomotiv» safida chempionlikni nishonladi. Tajribali yarim himoyachi 7ta gol urib, jamoasi muvaffaqiyatiga munosib ulush qo‘shdi.
4. Igor Taran («Sho‘rtan»). 32 yosh. 29ta o‘yin, 9ta gol.
Oliy liga-2016da 9ta gol urgan tajribali hujumchi jamoasi tarkibida eng yaxshi bo‘ldi. «Sho‘rtan» forvardi o‘z o‘yini bilan hali-veri klubdagi yetakchilikni hech kimga topshirgisi yo‘qligini ko‘rsatdi.
5. Ilhom Yunusov («Qizilqum»). 34 yosh. 30ta o‘yin, 10ta gol.
Milliy chempionatimizning to‘purar-penaltichisi. «Qizilqum» vakili o‘zining 10ta golidan 8tasini o‘n bir metrlik nuqtadan urgan. Bu ko‘rsatkichga Zlatan Ibragimovichdan boshqa har qaysi futbolchi havas qilsa arziydi.
6. Nemanya Yovanovich («Andijon»|«Qizilqum»). 33 yosh. 29ta o‘yin, 13ta gol.
O‘tgan yilgi eng yaxshi to‘purar legioner. Serbiyalik hujumchi «Andijon» tarkibida birinchi davrada 5ta gol urdi. Mavsum o‘rtasida «Qizilqum»ga o‘tgach, Navoiyda ham ajoyib sermahsullik namoyish etdi: hal qiluvchi bosqichda raqiblar darvozasi 8 marta ishg‘ol qilindi.
7. Zohid Abdullayev («Metallurg»). 32 yosh. 28ta o‘yin, 18ta gol.
«Metallurg» hujumchisi o‘tgan mavsum 18ta gol urib, O‘zbekiston chempionati to‘purarlari poygasida ikkinchi o‘rinni egalladi. Bu borada uni faqat Temurxo‘ja Abduxoliqov ortda qoldirdi. Ta’kidlash joiz, 2016 yil Zohid Abdullayev uchun omadli keldi.
