Xorijlik kasbdoshlarimiz futbol olamining eng yorqin voqealarini munosib baholagan holda, o‘ziga xos tarzda «Oskar» mukofoti bilan taqdirladilar.
Eng yaxshi dekorasiya - «Krasnodar» stadioni
Rossiya futbolidagi kam sonli ijobiy voqealarning eng yorqini sifatida e’tirof etilayotgan inshoot hatto futbolga umuman befarq bo‘lgan kishilarni ham maftun etadi. Shu yil kuzda Sergey Galiskiy jamoasi o‘z stadioniga ega bo‘ldi. Bu ko‘rkam arena 2016 yilda barpo etilgan stadionlar orasida nafaqat Yevropada, balki butun dunyoda yetakchi, desak, mubolag‘a bo‘lmaydi.
Eng jo‘shqin joziba - Jerdan Shakiri (25.06.2016 Yevro-2016, Shveysariya-Polsha)
O‘ta noyob iqtidor sohiblaridan shakllangan Shveysariya terma jamoasi odatdagidek navbatdagi yirik turnirda ham o‘z salohiyatidan to‘liq foydalana olmadi. Shunga qaramay, Jerdan Shakirining ilk «pley-off»dagi mo‘’jiza golini taqdirlashni lozim topdik. Chunki u o‘zining fantastik zarbasi bilan jamoasini «over taym»ga olib chiqqandi. Kim biladi deysiz, bo‘lajak «to‘pchi» Jakaning penaltilar seriyasidagi zarbasi aniq bo‘lganida Shveysariya noxush an’anaga chek qo‘ygan bo‘larmi-di... Zarbadan so‘ng darvozaning chap ustuni yonginasidan maydon tashqarisiga yo‘l olgan to‘p Shakirining mehnatini havoga sovurdi. Birgina umid bizga tasalli beradi: Fantastik «qaychilar» va boshqa hunarlar ustasi hali uzoq vaqt o‘z san’ati bilan muxlislarga zavq ulashadi.
Film uchun eng original sanudtrek - Yevro-2016dagi islandiyalik muxlislar
Qit’a miqyosidagi chempionatlar - nafaqat eng kuchli terma jamoalar, balki fanatlar o‘rtasidagi musobaqa hamdir. Yevro—2016da kamdan-kam uchraydigan voqea yuz berdi: «Tomoshabinlar mehrini qozonish bitta mamlakatning ham futbolchilariga, ham fanatlariga nasib etdi. Islandiyaliklarga xos «Huvv» degan hayqiriq dunyoning turli burchaklariga tarqagan bo‘lsada, original muhitni takroran yuzaga keltirishni hech kim uddalay olmadi».
Eng yaxshi mini serial - «Ramos-taym»: Serxio Ramos va 90-daqiqa
2016 yildagi serial ikki yil avval namoyish etilgan «Olachipor matraschilar anduhi» motivlari asosida yaratildi. Birinchi seriyasida yevrokubok finali suratga olingan bo‘lib, ikki ispan jamoalarining qarama-qarshiligida Ramosning goli bahsni «overtaym»larga olib chiqqan va yakunda uning jamoasi zafar quchgandi. Keyinchalik Ramos ko‘rinmay qolgandek tuyuldi. Ma’lum bo‘lishicha, u yanada zalvarliroq zarbani amalga oshirish uchun payt poylayotgan ekan - so‘nggi daqiqadagi samarali harakati bilan u «Kamp Nou»da qabriston sukunatini o‘rnatdi. Qo‘shimchasiga, «Deportivo»dan g‘alabani yulib oldi.
Eng yaxshi debyut ishi - Islandiya terma jamoasi Yevro-2016dek yirik turnirda
Birgina Islandiya terma jamoasining hurmati uchun, suyukli jamoasini qo‘llab-quvvatlash maqsadida Fransiyaga tashrif buyurgan orol aholisining 10 foizi uchun, Vitaliy Denisovni eslatadigan Birkir Byarnasonning ajoyib o‘yinlari uchun qayta-qayta tashkil etsa, arziydi. Aytingchi, xursandchiligini ichiga sig‘dirolmay aqldan ozgan islandiyalik sharhlovchiga avval ham duch kelganmisiz? «Pley-off» bosqichida Angliyadek qudratli raqibni tiz cho‘ktirgan jamoagachi? Ha, vikinglar avlodlari barchaga unutilmas futbol bayramini tortiq etishdi.
Rus tilidagi eng yaxshi erkak roli - Kvinsi Promes («Spartak»)
Kuz faslida bo‘lib o‘tgan «Spartak»-«Lokomotiv» bahsi teng kurashlar ostida kechgandi. Ijrochilarning mahoratiga ham bir xil baho berish mumkin. «Loko»dan oldingi chiziqda Aleksey Miranchuk qo‘mondonlik qilgan bo‘lsa, mezbonlardan bu ishni Promes o‘z zimmasiga olgandi.
Gollandiyalik futbolchining ajoyib uzatmasi Popov tomonidan golga aylangach, «Spartak» kichik hisobdagi g‘alabaga erishdi. Xalkdan keyin RPLning yorqin yulduziga aylangan Kvinsi tez orada Yevropaga yo‘l olishi aniq. Agar u Rossiyani qishda tark etsa, may oyida «Spartak» Promesga Rossiya chempionining oltin medalini jo‘natishiga to‘g‘ri keladi. Chunki g‘alabaga Kvinsi boshqalardan ko‘ra ko‘proq hissa qo‘shmoqda.
Eng yaxshi ssenariy - Krishtianu Ronaldu va Yevro-2016
Agar Ronaldu haqida yana film yaratilsa, Fransiyadagi qit’a birinchiligi film qahramonining barcha fazilatlarini to‘la ochib beradi. To‘g‘ri, turnir futbolchi uchun ham, uning jamoasi uchun ham og‘ir kechdi. Boz ustiga, hal qiluvchi bahsning 18-daqiqasida Dimitri Paye bilan to‘qnashib ketdi va jarohat olib, maydonni tark etdi. Albatta, maydonga qaytishga urinib ko‘rdi, lekin iloji bo‘lmadi. «Stad de Frans»dagi final Ronaldu uchun nihoyasiga yetgandi. Futbolchining o‘sha lahzalardagi ko‘rinishi ko‘hna Rimdagi fojialarni eslatardi: Ko‘z yoshlari bilan yuvilgan yuz, millionlab muxlislar ko‘zidagi yoshlar... Biroq Krishtianu boshqalar kabi yechinish xonasiga kirib ketmadi - murabbiy bilan birgalikda (ba’zan hatto murabbiy o‘rniga) jamoadoshlari o‘yinlarini boshqarishga kirishdi. Ehtimol, Ederni maydoga tushirish ham Santushning emas, Ronalduning tashabbusidir? Nima bo‘lganda ham, Eder orziqib kutilgan g‘alaba to‘pini raqib darvozasiga yo‘lladi. Ronaldu esa yana «yig‘lay boshladi». Albatta, bu endi uning quvonch yoshlari edi!
Eng yaxshi film - «Liverpul»-«Borussiya Dortmund»-4:3. (14.04.2016. YEL chorak finali)
Yurgen Klopp o‘zining sobiq jamoasiga qarshi birgina mana shu jihatning o‘zidayoq qarama-qarshilikka atom bombasi quvvatini baxsh etgandi. Boz ustiga, Dortmunddagi yagona gol «Enfild»dagi keskinlikni yanada oshirib yuborgandi. Qisqasi, Liverpul bayram taraddudida edi. Biroq avvaliga bayram azaga aylangandek bo‘ldi - 10-daqiqadayoq mehmonlar ikkita to‘p farqi bilan oldinga o‘tib oldilar. Ikkinchi bo‘lim mezbonlar uchun sal omadliroq bo‘ldi. Tomonlar bittadan gol urishdi. O‘yinning bir soati ortda qolganda «qizillar» oldida 3ta gol urish vazifasi turardi. Ayni shu lahzadan boshlab jamoa Rojers davrida umuman ko‘rsatolmagan hunarlarini namoyish eta boshladi. Tinimsiz hujumlar Koutinyoning «o‘rgimchak to‘rlari» va Lovrenning hal qiluvchi goli ajoyib spektaklga yakun yasadi.
Ikkinchi darajali eng yaxshi erkak roli - Dimitri Payet («Vest Xem»)
Dimitri avvalgi mavsumni ko‘ngildagidek o‘tkazdi. Ammo hal qiluvchi pallalarda doimo bir oz chetda qoldi. YECHL yo‘llanmasiga ega bo‘lish uchun «bolg‘achilar»ga atigi 4 ochko kamlik qildi, Payet esa «gol+pas» tizimida 31 (12}19) ball to‘pladi.
Terma jamoada ham hujumchining omadi chopmadi – o‘z uyidagi Yevroda Ruminiya ustidan g‘alabani ta’minlagan bo‘lsada, mutasaddilar ko‘proq Grizmannga ishonch bildirishdi.
Joriy mavsumda «Vest Xem» autsayderlar qatorini tark etolmayapti. Lekin qishda jamoa o‘zini o‘nglashga intilmoqda. Yana sermahsul o‘ynay boshlagan Payetning hissasi katta bo‘lyapti.
FOOTBALL HDning maxsus sovrini - Alan Rushel («Shapekoense»)
28 noyabr kuni yuz bergan aviahalokatdan so‘ng omon qolgan Alan Rushel matbuot anjumanida hayotdan bevaqt ko‘z yumgan jamoadoshlari xotirasi uchun maydonga qaytishni ma’lum qildi: «Hissiyotlarimni so‘z bilan ifodalay olmayman. Omon qolganim uchun bu yerda o‘tirganimga quvonishni ham, barcha do‘stlarimdan judo (yig‘lab) bo‘lganim uchun qayg‘urishni ham bilmayman. Boqiy dunyoga yo‘l olgan do‘stlarim xotirasi ularning ularning oilalariga bo‘lgan hurmatim maydonga qaytishni talab qilmoqda».
Do‘stlari qo‘lga kiritishga ulgurmagan sovrin Alanga nasib etishini tilab qolamiz.
Eng yaxshi erkak roli - N'Golo Kante («Lester»)
«Kante - bamisoli Wi-Fi, u hamma yerda hoziru-nozir» - Tom Adams, Britaniya Eurosport.
«Har holda, Kante hamon maydonda. Simpson maydondan chetlatilgandan keyin «Lester» I3 o‘yinchisi bilan uchrashuvni davom ettirmoqda!» - Mett Xyuz, The Times.
«Hozirda to‘pni raqibdan tortib olishda Kantega yetadigani yo‘q» - Rio Ferdinand.
«Kante - «Arsenal»ga Vyeyrani sotib yuborganidan keyin yetishmay kelayotgan futbolchi» - Pirs Morgan.
Ha, N'Golo APLda chempionlikka, Yevropada kumush medalga sazovor bo‘ldi, «Chelsi»ga o‘tish orqali «Lester»ni 32 million funtga boyitdi, o‘zi APLda yetakchi sifatida to‘p surmoqda.
Eng yaxshi rejissyor - Klaudio Ranyeri
Nima uchun taniqli murabbiy o‘zining ilk chempionligini yoshi 60dan oshganida nishonladi? Shu haqida o‘ylay-o‘ylay quyidagicha xulosa chiqardik: Nihoyat, Ranyeri «o‘z» jamoasini topdi. Ixtiyoridagi futbolchilardan ahil jamoa shakllantirib, imkoni boricha soat kabi aniq «yurish»ga o‘rgatdi. Kerakli taktikani topa olgani va yechinish xonasidagi totuvlik chempionlikni ta’minladi. Buyuklik - oddiylikda! Yangi mavsumda «tulkilar» odatiy jadvalning ikkinchi yarmidan joy olishdi. Lekin YECHLda pley-off bosqichiga yo‘l olishdi.
Chempionlik tantanalarida Ranyeridan «Lester»ning g‘alabasiga ta’rif berishni so‘rashganida, don Klaudio shunday dedi: «Jamoam zafarini buyuklar sirasiga qo‘shmayman. Buyuk natija «Nottingem Forest»ga tegishli. Bu jamoa elitadagi debyut mavsumida chempionlikka ham erishgan, YECHLni ham qo‘lga kiritgan! Biz bu ishni bir necha yil ichida amalga oshirsak, ajabmas».
Nima ham derdik, kamtarin murabbiyning kamtarona javobi. Ha aytgancha, «Lester» hozircha xalqaro arenadiga ishtirokini davom ettirmoqda, uning «pley-off»dagi dastlabki raqibi «Sevilya». Har holda, «Bavariya», «Real» yoki «Barselona» emas. Kim biladi deysiz, balki «tulkilar» YECHLda ham g‘olib chiqishar? Axir yaxshi niyat - yarim mol. Shunday emasmi?
Eng yaxshi aktyorlar jamoasi - «Lester»
Jamoaning deyarli barcha a’zolari haqida shu qadar ko‘p yozildiki, qandaydir qo‘shimcha qo‘shishning iloji yo‘q. Zafarli mavsum davomida «tulkilar»ni bir-necha martadan «dafn» qilganlar ko‘p bo‘ldi. Biroq jamoa oxirigacha kurashdi, chekinishni o‘ylamadi. Albatta, ta’qibchilarning omadsizliklari, «Lester»ga esa aksincha, omad kulib boqishi ham qandaydir ta’sirini o‘tkazdi. Lekin yakunda jamoa shohsupaga ko‘tarildi. Bu fakt. Endi uni hech kim o‘zgartira olmaydi!
